Morgunblaðið | 11.1.2022 | 10:30

Fengu hærra verð fyrir laxinn í fyrra

Laxeldisfyrirtækin fengu góð verð fyrir afurðirnar á síðasta ári. mbl.is/Helgi Bjarnason

Meðalverð á eldislaxi á mörkuðum nam 64,14 norskum krónum á kíló, jafnvirði 944 íslenskra króna, síðustu viku ársins 2021. Um er að ræða 7,26% lækkun meðalverðs frá vikunni á undan en 6,32% hærra meðalverð en var í lok nóvember og 19,46% hærra verð en var í byrjun október þegar fengust 53,68 norskar krónur á kíló.

Síðustu vikuna árið 2020 var meðalverð einungis um 52 norskar krónur, er það langt undir því sem fengist hefur á mörkuðum frá því í lok febrúar og hafa verð því verð þokkaleg á síðasta ári. Þetta má lesa úr laxavísitölu Nasdaq.

Þróun meðalverðs 2021. Skjáskot/Nasdaq

Hæsta meðalverð var um miðjan desember þegar fengust tæplega 75 norskar krónur, 1.100 íslenskar krónur, fyrir kíló af eldislaxi að meðaltali. Er það hæsta meðalverð ársins 2021 en litlu munaði að svipað meðalverð var um miðjan maí.

Verð voru á mikilli hreyfingu í ársbyrjun en verð hrundi 2020 þegar gripið var til lokanna vegna kórónuveirufaraldursins. Þá byrjuðu verð að hækka á ný þegar hófst að opna sumarið það ár en verð féll á ný þegar þurfti að grípa til sóttvarnaaðgerða á ný með haustinu og hélst verð lágt mest allt árið 2020.

Þróun meðalverðs árið 2020. Verð á laxi var mun minna en árið á eftir. Skjáskot/Nasdaq

Mikill verðmunur eftir stærð

Í desemberlok fékkst hæsta meðalverð fyrir lax á stærðarbilinu sex til sjö kíló eða 67,98 norskar krónur, jafnvirði 1.000 íslenskra króna. Lægsta meðalverð fékkst fyrir lax á stærðarbilinu eitt til tvö kíló eða 44,6 norskar krónur, jafnvirði 656 íslenskra króna.

Ef litið er til lax sem er í hefðbundinni sláturstærð, þrjú til sex kíló, nam meðalverð á mörkuðum síðustu viku síðasta árs 64,47 norskum krónum á kíló, jafnvirði 950 íslenskra króna. Er þetta 7,31% lægra en vikuna á undan, en 6,92% hærra en meðalverð í nóvemberlok og 21,82% hærra en í byrjun október.