Morgunblaðið | 11.1.2022 | 14:13

Lítill kraftur í veiðum sem eru frekar kropp

Kap var fyrtsa skip Vinnslustöðvarinnar sem kom til hafnar með loðnu á árinu. mbl.is/Sigurður Bogi

Þrjú uppsjávarskip Vinnslustöðvarinnar í Vestmannaeyjum og dótturfélagsins Hugins hafa komið til hafnar með um fimm þúsund tonn af loðnu til vinnslu í fiskimjölsverksmiðju fyrirtækisins. Gert er ráð fyrir að takist að ljúka við löndun í nótt.

Fram kemur í færslu á vef Vinnslustöðvarinnar að KAP VE-4 kom með fyrsta loðnufarminn sinn til Vestmannaeyja aðfararnótt gærdags. Síðan mætti Ísleifur VE-63 og svo mætti Huginn VE-55 með sinn afla.

„Ætla má að lokið verði við að landa úr öllum skipum aðra nótt og mikið verður því um að vera hjá Unnari Hólm og hans liði í bræðslunni næstu sólarhringa,“ segir Sindri Viðarsson, sviðsstjóri uppsjávarsviðs Vinnslustöðvarinnar, í færslunni.

„Loðnuvertíðin er sannarlega hafin og gott er það. Samt er ekki mikill kraftur í veiðunum enn sem komið er, frekar hægt að tala um kropp.“