Morgunblaðið | 17.1.2022 | 10:15 | Uppfært 10:52

Uppgrip á Akranesi á loðnuvertíð

Zibigniew Harasimczuk, til vinstri, og Helgi Þór Þorsteinsson voru um helgina að landa afla úr loðnuskipunum sem komu á Akranes. Uppgrip eru víða í sjávarbyggðum vegna loðnuveiði. mbl.is/Sigurður Bogi

Mikið var umleikis við Akraneshöfn um helgina þar sem afla var landað úr tveimur loðnuskipum sem þangað komu inn. Snemma á laugardagsmorgun kom Barði NK, skip Síldarvinnslunnar, á Skagann og var með um 2.200 tonn af loðnu. Víkingur AK, sem Brim hf. gerir út, kom svo á Akranes eftir hádegi í gær og var þá þegar hafist handa við að losa skipið, en ætlað var að um borð væru um 2.700 tonn af loðnu.

Á Akranesi fer aflinn í bræðslu og allar geymsluþrær þar eru nú orðnar smekkfullar. Ekki verður því hægt að taka meiri afla þar fyrr en líða tekur á vikuna, segir Sigurður Haraldsson löndunarstjóri.

Barði NK við bryggju á Akranesi og í baksýn er fiskimjölsverksmiðjan. mbl.is/Sigurður Bogi

Loðnan er nú norðaustur af Langanesi. Á þeim slóðum voru að veiðum í gær, eins og sjá mátti á marinetraffic.com, alls fimmtán skip; íslensk, norsk og grænlensk. Mestu er landað í Austfjarðahöfnum, en einnig hefur verið siglt með afla til Noregs. Nú er líka svo komið að loðna er orðin hæf til manneldis og slík vinnsla á afurðum er hafin í fiskiðjuveri Síldarvinnslunnar í Neskaupstað.

Á laugardag kom Hoffell SU, skip Loðnuvinnslunnar, til Fáskrúðsfjarðar með 1.640 tonn af loðnu sem fór í bræðslu. Í þrettán tíma landlegu, meðan landað var, fengu skipverjarnir níu hvorki að fara í land né neinn um borð. Þetta var gert í sóttvarnaskyni. „Núna er kominn ágætur kippur í veiðarnar og útlitið fyrir næstu daga virðist vera gott,“ segir Friðrik Mar Guðmundsson, framkvæmdastjóri Loðnuvinnslunnar, í samtali við Morgunblaðið.

Heimaey með 2.000 tonn

Skip Ísfélagsins í Vestmannaeyjum, Heimaey VE, var í gærkvöldi fyrir austan land á stími til Eyja með um 2.000 tonn af loðnu. Um tvo sólarhringa tók að fylla skipið.

„Á miðunum hafa skipin verið þétt á litlum bletti. Já, þetta er fín loðna sem við náðum núna. Ætli að jafnaði séu ekki um 40 fiskar í hverju kílói sem veiðist,“ sagði Ólafur Einarsson skipstjóri. Hann reiknaði aðspurður með að verða kominn til Eyja síðdegis í dag, en siglingunni að austan miðaði ágætlega þar sem öslað var í dæmigerðu janúarveðri; norðaustankalda og vindi sem sló í 12-15 metra á sekúndu.