Morgunblaðið | 20.1.2022 | 13:52

Hefja átak gegn slysum á sjó

Fyrsta veggspjaldið var kynnt í gær. Gefið verður nýtt út í hverjum mánuði út árið. Mynd/Samgöngustofa

Samgöngustofa, í samstarfi við Slysavarnafélagið Landsbjörg og fjölda aðila í sjávarútvegi, vinnur að útgáfu tólf rafrænna veggspjalda sem hlotið hafa nafnið „12 hnútar“. Fyrsta spjaldið var gefið út í gær og síðan eitt í hverjum mánuði þar eftir fram að lokum árs.

„Tilgangur þessa verkefnis er að fjalla um og undirstrika ýmsa þá mannlegu þætti sem oft leiða til slysa á sjó. Stórlega hefur dregið úr alvarlegum slysum á sjó og þykir nú orðið tíðindum sæta ef banaslys verður. Hins vegar eiga sér enn stað atvik sem leitt geta til alvarlegra slysa. Oft eru þetta afleiðingar tiltekinna viðhorfa, afstöðu, úreltra venja og ýmiss annars í mannlegri hegðun sem aukið geta líkurnar á slysum,“ segir í tölvupósti Einars Magnúsar Magnússonar, sérfræðings á öryggis- og fræðsludeild Samgöngustofu, til blaðamanns.

„Með 12 hnútum viljum við uppræta þessi atriði en á spjöldunum er getið um fyrirbyggjandi aðgerðir sem við vonum að sjómenn tileinki sér,“ skrifar hann.

Einar Magnús segir verkefnið unnið í samstarfi við fjölda aðila og að enn sé að bætast við þann hóp. Handrit og gerð spjaldanna var unnið í samvinnu við Slysavarnaskóla sjómanna.

Vilja fleiri með sér í lið

Þeir sem þegar hafa lagt nafn sitt við verkefnið eru: Brim hf., Félag skipstjórnarmanna, FISK Seafood, Hafnasamband Íslands, Landhelgisgæslan, Slysavarnafélagið Landsbjörg, Samtök aðila í ferðaþjónustu, Samtök fyrirtækja í sjávarútvegi, Sjómannasamband Íslands, VM – félag vélstjóra og málmtæknimanna, Vinnslustöðin hf., Visir hf. og Þorbjörn hf.

Að lokum hvetur Einar Magnús fyrirtæki, stofnanir og félög sem tengjast sjávarútvegi og hafa áhuga á að leggja nafn fyrirtækis síns eða samtaka við útgáfuna að hafa samband við Samgöngustofu.