Tónlistarmaðurinn Dagbjört Rúriksdóttir hefur verið í bata frá vímuefnum í rúmlega tvö ár. Hún hefur einstaka nærveru og jákvæða sýn á lífið þrátt fyrir mörg áföll og erfiðleika. Hún er nýjasti viðmælandi hlaðvarpsins Sterkari saman.
„Ég hafði alltaf verið glöð sem barn þrátt fyrir að hafa verið lögð í einelti. Manneskja náin mér sem ég treysti kallaði mig druslu og ég trúði honum,“ segir Dagbjört og bætir við að eftir það hafi hún farið að haga sér í samræmi við það.
„Ég fór að leita í vafasaman félagsskap og haga mér í samræmi við það sem ég hélt að fólki fyndist um mig.“
Áður en Dagbjört vissi af var líf hennar farið að snúast um helgarnar, hún hugsaði um að detta í það og lítið annað.
„Ég setti allt mitt virði í útlit og það sem aðrir sögðu um mig, maður á ekki að hengja virði sitt á það sem fölnar,“ segir hún og brosir út að eyrum.
Dagbjört talar um að hafa breyst mikið þegar sponsorinn hennar fór með hana á samkomu, hún lýsir þeirri upplifun fyrir okkur en fyrst vildi hún ekki vera þarna og fannst þetta óþægileg tilfinning.
„Allt í einu var eins og gríman mín væri að bráðna af, þykka gríman sem ég hef barist við að halda uppi öll þessi ár. Allt í einu var ég ein af öllum en ekki aðskilin frá öllum, ég elskaði alla því ég sá mig í þeim og þá í mér, þetta var ótrúlegt.“
Bataferli Dagbjartur hefur verið ferðalag þar sem hún lærir jafnt og þétt á sjálfa sig líka, hún vinnur mikla sjálfsvinnu og gefur af sér til þess að viðhalda góðu jafnvægi og vinna í sporunum.
„Ég gef af mér og miðla minni reynslu, bæði sögunni minni á fundum og því að hafa verið þolandi ofbeldis. Ég aðstoða aðra sem vilja vera í bata og segi söguna mína í tónlist til dæmis,“ segir Dagbjört sem gengur einnig undir listamannsnafninu DIA þar sem hún tjáir sig í gegnum tónlistina.
Við mælum með að allir hlusti á þessa mögnuðu stelpu sem hefur gengið í gegnum miklar áskoranir en lítur alltaf á björtu hliðarnar, sama hvað.