Morgunblaðið | 2.2.2022 | 17:06 | Uppfært 17:22

Loðnuráðgjöf gæti lækkað um 100 þúsund tonn

Hafrannsóknastofnun mun mögulega þurfa að leggja til að ræáðlagður hámarksafli á loðnuvertíðinni verði lækkaður úr 904 þúsund tonnum í 800 þúsund tonn. mbl.is/Eggert Jóhannesson

Hæglega gæti farið svo að Hafrannsóknastofnun leggi til að útgefnar veiðiheimildir á yfirstandandi loðnuvertíð lækki um 11,5% úr 904 þúsund tonnum í 800 þúsund tonn. Slíkt myndi hafa í för með sér að loðnukvóti íslensku skipanna myndi minnka, mögulega um 70 þúsund tonn ef litið er til hlut Íslendinga í veiðunum sem nemur 626 þúsund tonnum.

Þetta má lesa úr tilkynningu á vef Hafrannsóknastofnunar. Fram kemur að stofnunin telji mælingarnar ekki nægilega áreiðanlegar og að þörf sé á að halda í annan leiðangur.

Engin veiðiskip fengust til að aðstoða við mælingar að þessu sinni og sagði Þorsteinn Sigurðsson, forstjóri Hafrannsóknastofnunar, daginn áður en haldið yrði til mælinga að árangur leiðangursins væri háður veðurskilyrðum.

Frétt af mbl.is

Halda í loðnuleiðangur á morgun

Mikill munur á niðurstöðum mælinga

Árleg vetrarmæling loðnu fór fram 19. janúar til 2. febrúar eru og tóku hafrannsóknaskipin Árni Friðriksson og Bjarni Sæmundsson þátt og beittu bergmálmælingum á göngu loðnunnar austur eftir norðurmiðum og suður með kantinum austan lands.

Leiðangurinn skilaði af sér tvær óháðar mælingar á loðnustofninum en miklu munaði á mælingum. Í fyrri yfirferð mældist hrygningarstofn loðnunnar 403 þúsund tonn en 904 þúsund tonn í þeirri síðari. „Vegna þess að sú fyrri tafðist vegna óhagstæðra veðurskilyrða, var gisnari og líklegt er að loðna hafi gengið inn á svæðið á milli yfirferða, er litið svo á að sú fyrri gefi ekki rétta mynd af hrygningarstofninum og verður ekki tekið tillit til niðurstaðna hennar,“ segir í tilkynningunni.

Þá er hrygningarstofninn metinn 904 þúsund tonn og er stofnstærðin metin 1.104 þúsund tonn þegar tekið er tillit til afla fram að leiðangri, sem nemur 200 þúsund tonnum. Í haustleiðangri 2021 mældist stofninn hins vegar 1.833 þúsund tonn og ráðlagði því Hafrannsóknastofnun að hámarksafli á vertíðinni yrði 904 þúsund tonn.

Frétt af mbl.is

Sveiflur í mælingum á loðnu

100 þúsund tonna lækkun

„Þegar aflareglunni er beitt með 1.833 og 1.104 tonn sem upphafsstofn hermana skilaði það 800 þúsund tonna ráðgjöf. Það væri um 100 þúsund tonna lækkun á ráðlögðu heildaraflamarki (TAC) á yfirstandandi vertíð,“ segir í tilkynningunni.

Mikilvægt er að gert verði grein fyrir þessum upplýsingum tafarlaust, að mati Hafrannsóknarstofnunar.

Telja þörf á annarri yfirferð

Talið er að hafís norðvestan við Ísland hafi komið í veg fyrir að hægt yrði að mæla á svæði þar sem loðna hefur mögulega verið að finna í janúar. „Þess vegna telur Hafrannsóknastofnun nauðsynlegt að kanna það svæði frekar áður en lokaráðgjöf verður gefin út. Ráðgert er því að gera út leiðangur á norðvesturmið sem gæti leitt til hækkunar á mati hrygningarstofnsins, og þar af leiðandi einnig til hækkunar aflamarks. Leiði leiðangurinn hinsvegar ekki til hækkunar á mati mun lokaráðgjöf væntanlega verða um 800 þúsund tonn.“

Áform eru um að hefja nýjan leiðangur 8. febrúar en það er háð veðri og hafísskilyrðum. „Stefnt er að kynningu niðurstaðna og lokaráðgjöf um viku síðar,“ segir í tilkynningunni að lokum.

Leiðarlínur (gráar) og þéttleiki loðnuendurvarps (súlur hornrétt á leiðarlínur; Árni Friðriksson rauðar og Bjarni Sæmundsson bláar) í fyrri yfirferð (ofar) og síðari yfirferð (neðar) 18. janúar – 1. febrúar. Kort/Hafrannsóknastofnun

Fréttin hefur verið uppfærð