Morgunblaðið | 18.2.2022 | 18:03 | Uppfært 19:56

Loðnuráðgjöf lækkuð um 34.600 tonn

Hafrannsóknastofnun leggur til að loðnuafli á vertíðinni 2021/22 verði ekki meiri en 869.600 tonn. Ljósmynd/Havforskningsinstituttet

Hafrannsóknastofnun leggur til að loðnuafli á vertíðinni 2021/2022 verði ekki meiri en 869.600 tonn, sem þýðir 34.600 tonna lækkun ráðgjafar frá þeirri sem gefin var út 1. október 2021.

Þetta kemur fram í tilkynningu frá Hafrannsóknarstofnun.

Frétt af mbl.is

Loðnuráðgjöf gæti lækkað um 100 þúsund tonn

Byggir á mælingum á stærð veiðistofnsins

Ráðgjöfin byggir á samteknum niðurstöðum á mælingum á stærð veiðistofns í haustleiðangri (1834 þús. tonn) og leiðöngrum sem fóru fram frá 19. janúar til 14. febrúar (938 þús. tonn). Áætlaður afli á milli haust- og vetrarmælinga er 275 þús. tonn.

Mælingar fóru að mestu fram í leiðangri dagana 19.-31. janúar með þátttöku skipa Hafrannsóknastofnunar, r/s Bjarna Sæmundssonar og r/s Árna Friðrikssonar. Þá náðist að mæla loðnustofninn í seinni atrennu af tveimur dagana 25.-31. janúar í heildstæðri yfirferð frá Hornbanka að Hvalbak. Ekki var unnt að mæla vestar vegna íss. Því var farið í annan leiðangur á r/s Árna Friðrikssyni þegar skilyrði leyfðu rúmri viku síðar og náðist mæling frá Grænlandssundi austur yfir Kolbeinseyjarhrygg 10.-14. febrúar, að því er greint frá í tilkynningunni.

Dreifing loðnu í leiðöngrum 25. janúar-14. febrúar 2022. Kort/Hafrannsóknarstofnun

Umtalsverður munur á stærð stofnsins

Við heildarstofnmat hafi niðurstöður leiðangurs í febrúar vestan 22°V verið lagðar við mælingar í janúar. Óvarlegt hafi verið talið að gefa sér þá forsendu að loðna á svæðinu á milli Hornbanka og Kolbeinseyjarhryggjar í febrúar væri hrein viðbót við það sem mælt var í janúar. Þar liggi til grundvallar að loðnan á svæðinu hafi verið mjög blönduð, ennfremur hafi verið töluvert af loðnu sem var skammt komin í kynþroska á og því óvíst hvenær hún muni hrygna. Árgangurinn 2019, sem ber uppi veiðina á yfirstandandi vertíð, sé án efa stór, en mikil óvissa sé um hve stór hluti hans muni hrygna í vor. Þessir þættir geti skýrt umtalsverðan mun á mældri stærð stofnsins í haust og nú í vetur.

Ráðgjöf um aflamark byggist á því að 95% líkur séu á að hrygningarstofninn í mars verði yfir 150.000 tonnum að teknu tilliti til afráns. Samkvæmt því leiði þessi heildarmæling til veiðiráðgjafar upp á 869.600 tonn veturinn 2021-2022.