Morgunblaðið | 2.3.2022 | 10:13

Varhugaverð sigling út af Bjargtöngum

Skipstjórinn á Helgu Maríu RE náði ekki sambandi við skipverja á Garra er báturinn virtist stefna beint á Helgu Maríu. Ljósmynd/Eiríkur Jónsson

Varhugaverð sigling er yfirskrift skýrslu siglingasviðs RNSA þar sem fjallað er um atvik út af Bjargtöngum í svartaþoku í júlí í fyrra þar sem togarinn Helga María RE og plastbáturinn Garri BA áttu í hlut. Í sérstakri ábendingu RNSA er bent á skyldu skipstjórnarmanna til að hafa stöðuga hlustun á neyðarrás 16.

Helga María var á togferð til suðausturs en Garri á vestlægri stefnu á mikilli ferð og var talið að árekstrarhætta hefði skapast þar sem Garri virtist stefna á togarann. Skipstjóri Helgu Maríu reyndi, ásamt Vaktstöð siglinga, ítrekað að ná talstöðvar- og símasambandi við Garra án árangurs. Skipstjóri Helgu Maríu taldi sig hafa afstýrt árekstri með því að setja skipið á fulla ferð aftur á bak og hífa inn togvíra.

Við rannsókn kom fram að ratsjá Garra var biluð að sögn skipstjóra og AIS-tæki tengd við plotter. VHF-talstöð bátsins var ekki stillt á „dual watch“ (hlustun á rás 16 og aðra rás) og því heyrði skipstjóri ekki þegar kallað var. Skipstjóri Garra var í sinni fyrstu ferð með bátinn og sagðist hann hafa séð til Helgu Maríu en talið fjarlægðina vera meiri en raun var.