Morgunblaðið | 31.3.2022 | 10:31

„Stór áfangi í sögu hafrannsókna á Íslandi“

Þorsteinn Sigurðsson, forstjóri Hafrannsóknastofnunar, segir samninga um nýtt hafrannsóknaskip marka tímamót. mbl.is/Arnþór Birkisson

„Þetta er stór áfangi í sögu hafrannsókna á Íslandi,“ segir Þorsteinn Sigurðsson, forstjóri Hafrannsóknastofnunar, en síðdegis í dag undirrita hann, Bjarni Benediktsson fjármálaráðherra og Svandís Svavarsdóttir matvælaráðherra samning um smíði nýs hafrannsóknaskips.

Frétt af mbl.is

Þrjú spænsk tilboð í nýtt rannsóknaskip Hafró

Þorsteinn rifjar upp að farið hafi verið að tala um smíði nýs skips upp úr aldamótum, en þá hafi verið ákveðið að gera nauðsynlegar breytingar á rannsóknaskipinu Bjarna Sæmundssyni. Þær hafi átt að duga til ársins 2012, en nú tíu árum síðar sé komið að undirritun samninga.

Áætlað er að smíði skipsins taki 30 mánuði og að það komi til landsins haustið 2024.

Nýtt hafrannsóknaskip mun vera hið glæsilegasta. Mynd/Hafrannsóknastofnun

Tilboð upp á 4,8 milljarða

Áhersla hefur verið lögð á að skipið verði umhverfisvænt og sparneytið og verður það 70 metrar á lengd og tólf metrar á breidd. Forhönnun var í höndum Skipasýnar, en unnið hefur verið að hönnun og síðan útboðsferli í um þrjú ár. Skipið verður smíðað í Astilleros Armón-skipasmíðastöðinni í Vigo á Spáni. Fyrirtækið bauð 33,45 milljónir evra í smíðina, jafnvirði 4,8 milljarða íslenskra króna.

Ákvörðun um smíði skipsins var tekin 2018, en í tilefni 100 ára fullveldisafmælis Íslands samþykkti Alþingi í júní það ár þingsályktun um að sjávarútvegs- og landbúnaðarráðherra væri falið að hefja undirbúning að smíði hafrannsóknaskips sem ætlað væri að koma í stað rs. Bjarna Sæmundssonar.