Morgunblaðið | 1.4.2022 | 11:22

Þorsteinn Már áfram stjórnarformaður

Þorsteinn Már Baldvinsson mun áfram leiða stjórn Síldarvinnslunnar. Ljósmynd/Þórhallur Jónsson

Aðalfundur Síldarvinnslunnar hf. samþykkti að arðgreiðsla á árinu 2022 vegna rekstrarársins 2021 verði 2,01 krónur á hlut eða 3,4 milljarðar króna og verður arðurinn greiddur 13. apríl, að því er fram kemur í niðurstöðum aðalfundarins sem birtar hafa verið á vef félagsins.

Fram kemur að Þorsteinn Már Baldvinsson, forstjóri Samherja, hafi á aðalfundi Síldarvinnslunnar verið endurkjörinn í stjórn félagsins og mun hann áfram gegna hlutverki stjórnarformanns. Auk Þorsteins voru Anna Guðmundsdóttir, Baldur Már Helgason, Björk Þórarinsdóttir og Guðmundur Rafnkell Gíslason kjörin í stjórn félagsins.

Stjórnin, sem uppfyllir ákvæði laga og samþykkta félagsins um kynjahlutfall, var sjálfkjörin þar sem frambjóðendur voru jafnmargir og kjósa skyldi.