Morgunblaðið | 3.4.2022 | 16:20

Stórseiðin framleidd á Kópaskeri

Starfsemin gengur vel í fyrsta hluta stórseiðastöðvarinnar. Ljósmynd/Rifsós

Rifós, dótturfélag Fiskeldis Austfjarða, áformar að rúmlega fjórfalda stærð stórseiðastöðvar sinnar á Röndinni við Kópasker. Tilgangurinn er að skapa rými til að stækka seiðin sem fara í sjóeldisstöðvar móðurfélagsins á Austfjörðum til að stytta eldistímann í sjó og draga úr áhættu.

Rifós hefur byggt fyrsta áfanga stórseiðastöðvar sinnar við Kópasker og tók hún til starfa á síðasta ári. Nú stendur til að stækka stöðina margfalt. Í umhverfismatsskýrslu sem auglýst hefur verið kemur fram að í stöðinni verða alls fjórir kerapallar sem hver er með átta útikerum og verða kerin því alls 32. Kerin í fyrsta áfanga eru 900 kúbikmetrar að stærð en samkvæmt upplýsingum fyrirtækisins er stefnt að mun rúmmálsmeiri kerum í viðbótinni og að þau verði yfirbyggð eins og kerin sem komin eru. Ársframleiðsla getur orðið 8.800 tonn af laxfiskum á ári. Bora þarf allt að 24 holur eftir jarðsjó.

Guðmundur Gíslason, forstjóri Fiskeldis Austfjarða, segir að eftir að leyfi fáist verði stöðin stækkuð eftir því sem fyrirtækið hafi þörf fyrir.

Rifós rekur klak- og seiðastöð í Kelduhverfi. Seiðin eru flutt um 70 grömm að þyngd á Kópasker þar sem þau eru alin í jarðsjó þar til þau eru flutt 300 til 1.000 gramma í sjókvíar á Austfjörðum. Þangað eru þau flutt með brunnbát.

Guðmundur Gíslason, forstjóri Ice Fish farm - Fiskeldi Austfjarða mbl.is/Kristinn Magnússon

Fuglarnir færa sig til

Í umhverfismatinu kemur fram að talið er að framkvæmdin muni hafa talsverð neikvæð áhrif á tvo umhverfisþætti sem metnir voru, grunnvatn og vatnafar sem og fugla. Líklegt er talið að með mótvægisaðgerðum muni kríuvarpið ná sér aftur á strik norðar á svæðinu.

Meiri óvissa er um hettumávsvarpið sem er á fyrirhugaðri lóð en talið líklegt að það muni færi sig um set. Helstu mótvægisaðgerðir sem gripið verður til felast í því að slá eða beita lúpínusvæði norðan framkvæmdasvæðis og takmarka framkvæmdir á varptíma. Þá verður borholum dreift til norðurs til þess að lágmarka staðbundið álag dælingar. Framkvæmdin er talin hafa óveruleg áhrif á fornleifar, náttúruverndarsvæði, lyktarmengun, útivist og upplifun og að sjónræn áhrif verði óveruleg.