Morgunblaðið | 20.4.2022 | 17:11

Fiskimjölverksmiðjurnar ganga nú fyrir rafmagni

Börkur NK að landa kolmunna á Seyðisfirði í morgun. Ljósmynd/Síldarvinnslan/Ómar Bogason

Fiskimjölverksmiðjur Síldarvinnslunnar á Seyðisfirði og í Neskaupstað hafa frá miðnætti nýtt rafmagn við framleiðsluna, en Landsvirkjun hefur afnumið takmarkanir á afhendingu til stórnotenda. Til þessa hefur þurft á reiða sig á að brenna olíu til að knýja framleiðsluna.

Fyrsti kolmunnafarmurinn sem kom til Neskaupstaðar barst í fyrrakvöld og til Seyðisfjarðar í gærkvöldi. „Við erum að fá úrvalshráefni. Skipin koma með aflann vel kældan að landi. Við byrjuðum á að landa rúmlega 3.000 tonnum úr Vilhelm Þorsteinssyni EA og nú er verið að landa 1.700 tonnum úr Hákoni EA. Þetta byrjar með ágætum,“ segir Hafþór Eiríksson, verksmiðjustjóri Síldarvinnslunnar í Neskaupstað, í færslu á vef fyrirtækisins.

Frétt af mbl.is

Allar skerðingar afnumdar

„Við erum að fá hráefnið til okkar kælt og ferskt. Kolmunninn er ekki mjög feitur á þessum árstíma þannig að það fæst ekki mikið lýsi úr honum en við fáum vart betra hráefni til mjölframleiðslu. Börkur NK kom með fyrsta farminn til okkar í gærkvöldi, rúmlega 3.000 tonn, og það var strax hafist handa við að landa og vinna aflann. Nú getum við keyrt á rafmagni á ný og það er mikið fagnaðarefni. Beitir NK er síðan á leiðinni til okkar með fullfermi þannig að þetta lítur bara vel út,“ segir Eggert Ólafur Einarsson, verksmiðjustjóri á Seyðisfirði, í færslunni.