Morgunblaðið | 22.4.2022 | 21:51

Tæp tvö þúsund skoðuðu frystihús Samherja

Gestagangur var í frystihúsi Samherja á Dalvík sumardaginn fyrsta. Tæplega tvö þúsund litu við. Ljósmynd/Samherji/Axel Þórhallsson

Hátt í tvö þúsund gestir heimsóttu frystihús Samherja á Dalvík sumardaginn fyrsta, en það mun vera í fyrsta sinn sem almenningur fékk að skoða húsið frá því það var tekið í notkun 2020. Til stóð að halda opið hús fyrir tveimur árum en vegna faraldursins var frystihúsið um tíma lokað öðrum en starfsfólki.

Vinnslan var í fullum gangi þegar gestir báru að garði og gafst því tækifæri til að fylgjast með þegar hráefni verður afurð í einni tæknivæddustu vinnslum á heimsvísu.

Frétt af mbl.is

Samherji tekur milljarða fjárfestingu í notkun

„Við runnum nokkuð blint í sjóinn varðandi fjölda gesta. Áhuginn kom mér ánægjulega á óvart og einnig hversu þægilegt var að taka á móti svo miklum fjölda. Spurningar fólks voru eðlilega af ýmsum toga, skemmtilegast fannst mér þó að hitta fyrrum samstarfsfólk og rifja upp góðu dagana í eldra húsinu,“ segir Sigurður Jörgen Óskarsson, vinnslustjóri Samherja, í færslu á vef fyrirtækisins.

„Straumurinn var nokkuð jafn og stöðugur allan tímann sem opið var, þannig að þetta gekk allt saman vel fyrir sig, enda húsið stórt og vítt til veggja. Þetta var frábær byrjun á vonandi góðu sumri,“ segir hann.

Létt var yfir mannskapnum. Ljósmynd/Samherji/Axel Þórhallsson

„Það er um margt nokkuð flókið að sýna matvælavinnslu þegar framleiðsla er í gangi. Hérna á Dalvík starfar dugmikið fólk sem sýndi almenningi með stolti sinn vinnustað og ég er þakklátur öllum sem gerðu þennan dag að veruleika. Ég er nokkuð viss um að gestir urðu margs vísari um íslenskan sjávarútveg og hversu framarlega við Íslendingar stöndum,“ er haft eftir Þorsteini Má Baldvinssyni, forstjóra Samherja, í færslunni.

„Húsið hefur vakið talsverða athygli bæði innanlands og erlendis. Margir eru að koma sérstaka ferð til Íslands til þess að skoða tæknina og aðbúnaðinn og þannig verður það sjálfsagt næstu mánuðina,“ segir hann.