Morgunblaðið | 3.5.2022 | 11:52

Bjartsýni ríkir hjá strandveiðimönnum

Fjölda strandveiðibáta mátti sjá á Pollinum á Akureyri þegar veiðar hófust. mbl.is/Hafþór Hreiðarsson

Fremur fáir reru í gær þegar strandveiðitímabilið hófst þar sem veður var ekki hagstætt víða á landinu. Fleiri bátar hafa hins vegar tilkynnt um þátttöku í strandveiðum en í fyrra að sögn Arnar Pálssonar, framkvæmdastjóra Landssambands smábátaeigenda.

„Það virðist ætla að fjölga hjá okkur. Um 440 hafa tilkynnt sig til Fiskistofu skilst mér og fleiri eru tilbúnir til að hefja veiðar nú þegar tímabilið hefst heldur en var í fyrra. Veðrið í dag var hins vegar ekki jafn gott og á fyrsta degi í fyrra. Þessir minni bátar eru auðvitað háðir því og það hefur farið eftir stærð bátanna hverjir fóru á miðin,“ sagði Örn þegar Morgunblaðið ræddi við hann í gær. Hann segir gott hljóð vera í smábátasjómönnum í upphafi sumars á heildina litið.

„Það ríkir mikil bjartsýni hjá strandveiðimönnum. Verð fyrir aflann var töluvert hærra í apríl en á sama tíma í fyrra. Við eigum því von á að menn geti borið þokkalega vel úr býtum,“ sagði Örn.