„Tvö göt fyrir neðan sjólínu“

Þessi upptaka þykir staðfesta fyrri fullyrðingu Úkraínumanna þess efnis að hersveitir þeirra hafi skotið tveimur skipaflaugum á eldflaugabeitiskipið. Moskvuvaldið hefur til þessa ekki viljað viðurkenna það, segir Svartahafsflotaflaggskipið hafa laskast eftir óútskýrða sprengingu í vopnageymslum skipsins og sokkið í kjölfar þess. Þá þykir upptakan einnig renna stoðum undir þá kenningu að brú skipsins hafi snemma verið tekin út og að áhöfnin hafi yfirgefið Moskvu í miklum flýti.

Vilja ekki jarðneskar leifar

Einkennileg staða er nú komin upp í Kænugarði í norðurhluta Úkraínu. Þar hafa að undanförnu lík hundraða rússneskra hermanna safnast upp því Moskvuvaldið hefur ekki samþykkt að taka við þeim. Þess í stað hafa Úkraínumenn þurft að safna líkunum saman og geyma þau í kælivögnum á lestarstöð við höfuðborgina. Ofursti í Úkraínuher segir ljóst að ekki sé hægt að geyma líkin við þessar aðstæður til lengdar. Vilji Rússar ekki taka við þeim neyðast Úkraínumenn til að brenna þau. Sama staða mun vera komin upp víða í Úkraínu. Eru þannig lík þúsunda rússneskra hermanna sögð geymd í kælivögnum.

Varaforsætisráðherra Úkraínu, Iryna Vereshchuk, sér um viðræður við Rússa um skipti á stríðsföngum. Hún segir Moskvuvaldið ekki hafa nokkurn áhuga á jarðneskum leifum hermanna sinna, nenni ekki að ræða viðfangsefnið. „Líklegast telja þeir lík fallinna hermanna Rússlands ekki eiga skilið að snúa heim aftur til greftrunar,“ segir hún.

Taka áhættu vegna þrýstings

Varnarmálaráðuneyti Bretlands segir augljóst að Moskvuvaldið beiti herstjórn innrásarliðsins í austurhluta Úkraínu miklum þrýstingi. Hávær krafa sé um stóra sigra án tafar. Þessi þrýstingur hefur orðið þess valdandi að herforingjar leggja sumir allt undir með skelfilegum afleiðingum fyrir herinn. Nýlegt dæmi um slíkt er þegar heilt herfylki var þurrkað út með stórskotaliði þegar það gerði tilraun til að brúa á. Hundruð hermanna féllu í valinn.