Morgunblaðið | 18.5.2022 | 19:21

Sigurður Ingi vill upphefja konur

Sigurður Ingi segir Framsóknarflokkinn lengi hafa lagt áherslu á velferð barna. mbl.is/Eggert Jóhannesson

„Í engri starfsstétt er jafnmikill kynjahalli og í sjómennsku,“ segir Sigurður Ingi Jóhannsson, innviðaráðherra og formaður Framsóknarflokksins, í aðsendri grein í Morgunblaðinu í dag í tilefni af alþjóðadegi kvenna í siglingum. Vill hann með greininni hvetja fleiri konur í sjómennsku.

„Örfáar konur hafa útskrifast úr skipstjórn eða vélstjórn. Einungis 1% skipstjórnarmenntaðra eru konur. Til samanburðar eru konur handhafar tæplega 12% flugskírteina. Af 2.542 sem hafa útskrifast af lokastigi vélstjórnar, eru sjö konur,“ segir hann.

Frétt af mbl.is

Fyrsti alþjóðadagur kvenna í siglingum

Mikilvægt er að beina athygli ungra kvenna að þeim starfsmöguleikum sem eru á sjó að mati Sigurðar Inga, hvort sem er við fiskveiðar, flutninga, rannsóknir eða nýsköpun tengda sjávarútvegi. „Með fleiri og fjölbreyttari atvinnutækifærum fyrir konur, tryggjum við ekki einungis bætta stöðu kynjanna, heldur rennum sterkari stoðum undir sjávarbyggðirnar þar sem kynjahalli hefur verið viðvarandi vegna einhæfni starfa.“

Það er „bjartara framundan“ að sögn Sigurðar Inga sem vekur athygli á að 7% af nemum í skipstjórn séu konur. Jafnframt bendir hann á að mikill launamunur kynjanna í sjávarbyggðum megi meðal annars rekja til hárra tekna karla á sjó, en aðeins 9% af þeim sem vinna við fiskveiðar eru konur og 43% af þeim sem starfa við fiskvinnslu.

„Ég vil hvetja stofnanir og fyrirtæki sem hafa sjóinn að vettvangi til að brjóta hefðir og opna dyr sínar og skapa hvetjandi umhverfi þar sem konur njóta jafnræðis á við karla í störfum á sjó,“ segir hann að lokum. Greinina má lesa hér eða í Morgunblaðinu.