Morgunblaðið | 9.6.2022 | 12:58 | Uppfært 15:17

Gísli heiðraður sem framúrskarandi skipstjóri

Gísli jónsson, t.h., var heiðraður í Gerðarsafni í gærkvöldi. Ljósmynd/IceFish

Gísli V. Jónsson, skipstjóri á Páli Jónssyni GK-7, var í gærkvöldi heiðraður sem framúrskarandi skipstjóri við verðlaunaafhendingu Íslensku sjávarútvegssýningarinnar í Gerðarsafni í gærkvöldi.

Gísli lauk á síðasta ári sini síðustu sjóferð eftir að hafa stundað sjómennsku í meira en hálfa öld. Hann hafði þá verið til sjós frá 1966, en ferillinn byrjaði á bátum sem gerðir voru frá heimahögunum á Stokkseyri. Seinna var hann á bátum austur á landi. Bjó svo alls þrjátíu ár í Þorlákshöfn og reri þaðan; skipstjóri frá árinu 1973.

Árið 1996 réð hann sig síðan til Vísis hf. í Grindavík og munstraðist svo þegar fram liðu stundir á bátinn Pál Jónsson GK, hinn fyrri. Þegar nýr Páll Jónsson kom til landsins 2020 tók Gísli til starfa sem skipstjóri á honum fram að starfslokum.

„Þegar einu verkefni lýkur set ég punktinn og sný mér að einhverju öðru. Alls 55 ár til sjós og 48 ár sem skipstjóri; þetta er orðið ágætt. Ætla að leggjast í ferðalög og njóta lífsins; heilsan er góð og lífskrafturinn enn til staðar. Fram undan eru skemmtilegir tímar,“ sagði Gísli um starfslokin í viðtali við Morgunblaðið í fyrra.

Verðlaunin í ár eru styrkt af Vónin, Bureau Veritas og Morgunblaðinu og voru afhent við hátíðlega athöfn í Gerðarsafni í Kópavogi á fyrsta degi sjávarútvegssýningarinnar í gær, en hún er haldin í Fífunni og lýkur á morgun.