Morgunblaðið | 17.6.2022 | 7:00 | Uppfært 27.7.2022 14:52

Lengra stopp og færra starfsfólk

Guðmundur Smári Guðmundsson, framkvæmdastjóri G.Run í Grundarfirði.

Viðsjár eru í sjávarútvegi vegna ráðgjafar Hafrannsóknastofnunar, þar sem gert er ráð fyrir að aflamark í þorski á næsta fiskveiðiári verði skert um 6% og um 20% í kvóta.

„Áfallið er mikið og allar forsendur í okkar rekstri og starfsemi eru breyttar. Ég tel ráðgjöf Hafró heldur ekki raunhæfa, enda byggð fremur á kennisetningum en jafn ítarlegum rannsóknum og þyrfti,“ segir Guðmundur Smári Guðmundsson, framkvæmdastjóri G.Run í Grundarfirði, í samtali við Morgunblaðið. Ráðgjöf og tillögur nú telur Smári raunar sýna að uppbygging á þorskstofninum, sem verið hefur áherslumál í stjórnmálum og hafrannsóknum, hafi mistekist.

Nýtt fiskvinnsluhús G.Run í Grundarfirði var tekið í notkun árið 2019 og miðað við full afköst geta þar farið í gegn um 6.300 tonn af fiski árlega. Framleiðslan í dag nær því að vísu ekki og vinnslan liggur niðri í um tvo mánuði á ári yfir hásumarið. Nú telur Smári líklegt að lengja verði tímann sem lokað er í þrjá mánuði og hugsanlega fækka starfsfólki. Hugsanlegt sé að aðeins verði unnin um 4.500 tonn á ári í húsinu nýja. Nú sé raunar svo komið að endurskoða þurfi forsendur í rekstri G.Run. Þær hafi miðast við að heimildir til veiða á þorski og karfa, sem fyrirtækið hefur mikið byggt á, héldust óbreyttar frá því sem verið hefur. Bygging nýs fiskvinnsluhúss og skipakaup á síðustu árum hafi miðast við slíkt.