Morgunblaðið | 11.7.2022 | 9:54 | Uppfært 12.7.2022 10:05

Vaxtarmöguleikar í Grindavík

Grindavík. Vísisbátarnir fremst, en aftar togarar Gjögurs hf. Síldarvinnslan hefur keypt Vísi. mbl.is/Sigurður Bogi

Síldarvinnslan hf. hefur fest kaup á öllu hlutafé Vísis hf. Mun Vísir þar með verða dótturfélag Síldarvinnslunnar en hluthafar Vísis fá hlut í Síldarvinnslunni.

„Við teljum að þessi sátt í samfélaginu byggi svolítið á því að þessi fyrirtæki fari á markað. Hluthafar Vísis eru komnir með sitt fyrirtæki á markað í gegnum Síldarvinnsluna og uppbygging sameiginlegs félags er þá í bolfiskinum hérna,“ segir Pétur Hafsteinn Pálsson, framkvæmdastjóri Vísis, í samtali við Morgunblaðið.

Frétt af mbl.is

Síldarvinnslan kaupir Vísi

„Við erum búnir að vera að styrkja stoðir félagsins lengi. Miðað við þær viðmiðunarreglur sem gilda í dag um kvóta má segja að við séum að taka stórt skref,“ segir Gunnþór Ingvason framkvæmdastjóri Síldarvinnslunnar.

Frétt af mbl.is

„Mikil tækifæri“ í kaupunum

Sterkt bolfisksfélag

Gunnþór telur mikil tækifæri fólgin í samlegð félaganna. „Það liggur fyrir að síldarvinnslan hefur bætt við sig heimildum í bolfiski, á meðan Vísir er sterkt bolfisksfélag og lagt mikið í hátæknivinnslu í Grindavík.“

Pétur segir Grindavík bjóða upp á mikla vaxtarmöguleika. „Við erum með staðsetninguna, nálægt útflutningshöfnum og flugvellinum, hátæknivinnslur sem búið er að fjárfesta í og þjálfaðan mannafla.“

Fannar Jónasson, bæjarstjóri í Grindavík, kveðst þá í samtali við Morgunblaðið vonast til að þessi kaup verði til þess að starfsemin eflist enn frekar.

Lesa má nánar um málið í Morgunblaðinu í dag.