Morgunblaðið | 11.8.2022 | 17:31 | Uppfært 20:39

Boðuð í skýrslutöku á ný

Blaðamennirnir fjórir sem lögreglan á Norðurlandi eystra hefur boðað í yfirheyrslu vegna meintra brota á friðhelgi einkalífsins. Aðalsteinn Kjartansson, blaðamaður á Stundinni, Arnar Þór Ingólfsson, blaðamaður á Kjarnanum, Þóra Arnórsdóttiur, ritstjóri Kveiks á Ríkisútvarpinu og Þórður Snær Júlíusson, ritstjóri Kjarnans, Samsett mynd

Blaðamennirnir fjórir, sem notið hafa réttarstöðu sakborning vegna meintra brota á friðhelgi einkalífs, hafa verið boðaðir til skýrslutöku að nýju af lögreglunni á Norðurlandi eystra.

Þetta kemur fram í frétt Ríkisútvarpsins. Þegar er búið að taka skýrslu af tveimur þeirra.

Blaðamennirnir sem um ræðir eru þau Aðalsteinn Kjartansson á Stundinni, Þóra Arnórsdóttir á Ríkisútvarpinu, Þórður Snær Júlíusson og Arnar Þór Ingólfsson á Kjarnanum.

Hlutu þau réttarstöðu sakbornings vegna umfjöllunar um svokallaða „skæruliðadeild“ Samherja, nokkra starfsmenn fyrirtækisins, sem þótti það ekki ganga nógu hart í vörn sinni vegna frétta af umsvifum þess í Namibíu.

Þar á meðal Páll Steingrímsson, skipstjóri hjá Samherja, en hann hefur lagt fram kæru til lögreglu vegna stuldar á síma og notkunar á gögnum úr honum.

Þórður Snær og Arnar Þór mættu í skýrslutöku í dag, en Þóra og Aðalsteinnn bíða sinnar skýrslutöku.