Morgunblaðið | 15.8.2022 | 14:08

Snæfell EA kom til hafnar á laugardag

Snæfell EA kemur til hafnar á Akureyri. Skipið hét áður Akraberg og var gert út af Framhejra í Færeyjum. mbl.is/Hafþór Hreiðarsson

Frystitogarinn Snæfell EA 310 kom til hafnar á Akureyri á laugardag eftir siglingu frá Danmörku. Samherji keypti frystitogarann af Framherja í Færeyjum, en þá hét skipið Akraberg FO. Samherji á þriðjungshlut í Framherja.

Skipið var smíðað árið 1994 í Noregi fyrir Hrönn hf. á Ísafirði og hét upphaflega Guðbjörg ÍS. Kristján Vilhelmsson, útgerðarstjóri Samherja, sagði í viðtali við Morgunblaðið í maí, þegar kaupin voru tilkynnt, að útgerðin hygðist nota skipið til grálúðuveiða í íslenskri lögsögu. Grálúðan verður hausuð, sporðskorin og heilfryst um borð. Þá reiknaði hann með því að 18 menn yrðu í áhöfn.

Frétt af mbl.is

Samherji kaupir Akraberg

Samherji eignaðist togarann árið 1997 þegar Hrönn hf. rann inn í samsteypuna. Stuttu síðar var hann seldur til Þýskalands og hét þá Hannover NC. Skipið kom aftur í flota Samherji aftur árið 2002. Þá var því breytt í fjölveiðiskip. Það var sent aftur til Þýskalands 2007 og Framherji keypti skipið 2013.