Það er óhætt að segja að TikTok sé áhrifamikill miðill, en þar má meðal annars finna fjölda myndskeiða þar sem notendur deila sínum uppáhaldssnyrtivörum. Þó nokkrir snyrtivörurisar hafa tekið upp á því að merkja vörurnar sem verða vinsælar á TikTok sérstaklega í netverslunum sínum, enda hafa þær vörur sem verða áberandi á miðlinum verið gífurlega eftirsóttar og selst upp á mettíma.
Smartland tók saman tíu snyrtivörur sem hafa gert allt vitlaust á TikTok að undanförnu, en af vörunum að dæma virðist ljómandi húð og fallegir kinnalitir vera aðal málið í dag.
Hollywood Flawless Filter ljómagrunnur
Ljómagrunnurinn frá Charlotte Tilbury er líklega vinsælasta varan á TikTok, enda hafa stjörnur á borð við Zendya, Adele og Emma Roberts dásamað vöruna. Varan gefur húðinni fallegan og náttúrulegan ljóma, en hún gætur bæði verið notuð ein og sér eða undir farða.
Dior varaolía
Varaolían frá Dior hefur verið að gera allt gjörsamlega vitlaust á miðlinum, enda mikil lúxusvara sem er bæði falleg. Varan er sögð gefa vörunum náttúrulegan gljáa sem gerir það að verkum að þær verða bústnari og virðast stærri.
Soft Pinch kinnalitur
Snyrtivörumerkið Rare Beauty, sem er í eigu tónlistarkonunnar Selena Gomez, kom á markaðinn í september 2020. Síðan þá hafa vörurnar rokið út og hefur krem kinnaliturinn verið einna vinsælastur, en hann þykir afar fallegur og auðveldur í notkun.
REFY augabrúnasett
Þykkar augabrúnir hafa verið allsráðandi í snyrtivöruheiminum að undanförnu, en augabrúnasettið frá REFY hefur slegið rækilega í gegn og þykir hin fullkomna þrenna til að ná fram þykkum augabrúnum. Í settinu er augabrúnagel, augabrúnavax með lit og augabrúnablýantur.
Vatnsmelónu ljómaserum
Húðvörur sem veita húðinni heilbrigðan ljóma hafa verið aðal málið í sumar, en þar á meðal er vatnsmelónu ljómaserumið frá Glow Recipe. Serumið á að gefa húðinni raka og um leið ferskan ljóma án þess að innihalda glimmer.
Iconic nude varablýantur
Tískugyðjurnar Matilda Djerf og Hailey Bieber eiga það sameiginlegt að lofsyngja þennan varablýant, en eftir að þær sýndu hann á TikTok seldist hann upp á mettíma. Liturinn sem þær nota heitir Iconic Nude.
Lash Sensational Sky High maskari
Lash Sensational Sky High maskarinn frá Maybelline tekur augnhárin upp á annað level, en hann bæði lengir þau og gefur þeim fyllingu. Þegar maskarinn kom fyrst á markaðinn varð hann fljótt vinsæll og er í dag gjarnan kallaður „TikTok maskarinn.“
Pinkgasm kinnalitur
Þessi vara hefur notið gríðarlegra vinsælda og hefur verið nánast ófáanleg í langan tíma, en samkvæmt Byrdie voru á tímabili yfir 50 þúsund manns á biðlista eftir vörunni sem gefur kinnunum ómótstæðilegan bleikan ljóma.
Brazilian Bum Bum krem
Vörulínan frá Sol de Janero hefur slegið rækilega í gegn, en ásamt kreminu fást ýmsar aðrar líkamsvörur sem hafa verið afar vinsælar á TikTok. Vinsældirnar virðast hverfast um ómótstæðilega lykt vörulínunnar, en henni er lýst sem blöndu af vanillu, saltkaramellu og pistasíu hnetum.
Dior kinnalitur
Þessi fallegi kinnalitur frá Dior varð fyrst vinsæll eftir að raunveruleikastjarnan og athafnakonan Kylie Jenner deildi honum með fylgjendum sínum, en að hennar sögn er þetta hinn fullkomni litur á kinnarnar.