Morgunblaðið | 18.8.2022 | 14:44

Hófu vinnslu á ný á Seyðisfirði

Vinnsla er komin á fullt í frystihúsinu á Seyðisfirði. mbl.is/Eggert Jóhannesson

Vinnsla hófst á ný í frystihúsi Síldarvinnslunnar á Seyðisfirði á mánudag eftir rúmlega mánaðar sumarlokun. Fram kemur í færslu á vef útgerðarinnar að fiskur hafi komið til vinnslu frá Vestmannaeyjum sem og fiskur sem keyptur var á markaði.

„Hér er allt komið í fullan gang og allir hressir,“ segir Róbert Ingi Tómasson, framleiðslustjóri, í færslunni.

Þá kom ísfisktogarinna Gullver NS til hafnar á Seyðisfirði í gær eftri veiðar í Lónsbugt, á Lónsdýpi, í Berufjarðarál og á Fætinum. Um borð var 90 tonna afli, mest þorskur og ýsa. „Þetta gekk sæmilega en of mikill tími fór þó í að leita að ufsa sem erfiðlega gengur að finna. Það var alger renniblíða allan túrinn og það var svo sannarlega gott. Það er gert ráð fyrir að haldið verði á ný til veiða á morgun,“ segir Steinþór Hálfdanarson, skipstjóri.