Morgunblaðið | 14.9.2022 | 12:45

Óvissa skerðir tækifæri framtíðarinnar

Heiðrún Lind Marteinsdóttir framkvæmdastjóri SFS. Árni Sæberg

Árið 2007 ákváðu færeysk stjórnvöld að innkalla allar aflaheimildir í sjávarútvegi áratug síðar, árið 2017, og að þær yrðu í kjölfarið boðnar út til hæstbjóðenda. Á þessu tíu ára tímabili kom ekkert nýtt skip inn í færeyska flotann.

„Þarna höfum við gott dæmi um það hversu fljótt getur fjarað undan verðmætasköpun í atvinnugrein sem þarf mikið fjármagn og býr við mikla áhættu. Þetta verður að forðast,“ segir Heiðrún Lind Marteinsdóttir, framkvæmdastjóri Samtaka fyrirtækja í sjávarútvegi, í viðtali við ViðskiptaMoggann í dag. Þar er hún meðal annars spurð um þá óvissu sem sjávarútvegur býr við vegna orðræðu stjórnmálamanna, og svarar því til að óvissa sé slæm fyrir allan rekstur, ekki bara sjávarútveg.

Grípum ekki tækifærin

„Hún takmarkar fyrirsjáanleika og kemur í veg fyrir að fyrirtæki geti gert raunhæfar áætlanir til lengri framtíðar. Í þannig umhverfi halda fyrirtæki að sér höndum, fjárfestingar verða minni og það dregur úr verðmætasköpun. Óvissan veldur því að við grípum ekki tækifærin sem eru fyrir framan okkur. Það er því óheppilegt að það fari reglulega fram umræða um það hvernig eigi að umbreyta kerfinu í verulegum atriðum,“ segir Heiðrún Lind jafnframt.

Í viðtalinu er meðal annars rætt um störf nefndar sem ætlað er að greina áskoranir og tækifæri í sjávarútvegi og hvort vinna nefndarinnar sé til þess fallin að skila einhverri niðurstöðu, um samkeppnishæfni sjávarútvegsins erlendis, og margt fleira.

Lestu ítarlegt viðtal við Heiðrúnu í ViðskiptaMogganum í dag.