Morgunblaðið | 23.9.2022 | 10:38 | Uppfært 10:55

Of snemmt að segja til um stærð loðnuvertíðarinnar

Hluti leiðangursins sem rannsóknaskipið Árni Friðriksson átti að sinna tafðist í viku vegna bilunnar. mbl.is/Eggert Jóhannesson

Viðrað hefur vel á loðnuleiðangri Hafrannsóknastofnunar, en yfirferð rannsóknaskipsins Árna Friðrikssonar tafðist um viku vegna bilunar. Þetta segir Sigurður Þór Jónsson sem leitt hefur leiðangurinn.

Stærsta loðnuvertíð í tvo áratugi fór fram síðastliðin vetur og hefur verið spáð stórri vertíð á komandi vetri.

Sigurður segir loðnu hafa fundist í leiðangrinum en að of snemmt sé að segja til um það hvort gera megi ráð fyrir jafn stórri vertíð og fyrri spár Hafrannsóknastofnunar gáfu í skyn.

Hafís takmarkaði norðurför

En eru mælingarnar áreiðanlegar? „Já, að minnsta kosti hvað varðar skilyrði til mælinga á útbreiðslusvæði loðnunnar,“ svarar hann.

„Veður hefur verið einstaklega gott, aðeins skammvinnar smábrælur hingað til. Hafís kom í veg fyrir að Árni færi norður fyrir 72˚40', en það kemur mest niður á haf- og vistfræðihluta rannsóknarinnar. Loðnuleiðangur grænlenska rannsóknaskipsins Tarajoq, sem nú hefur lokið sínum hluta, og Árna Friðrikssonar hefur í aðalatriðum gengið vel, þrátt fyrir ríflega viku töf vegna bilunar Árna,“ útskýrir hann.