Morgunblaðið | 29.9.2022 | 13:45

„Margir sem bíða spenntir eftir jólasíldinni“

Síldin sett í tunnur en í þeim marínerast hún í um mánaðartíma. Ljósmynd/Síldarvinnslan: Jón Gunnar Sigurjónsson

Hafin er vinna við gerð hinnar hefðbundnu jólasíldar Síldarvinnslunnar. „Það eru margir sem bíða spenntir eftir jólasíldinni okkar og ég þori að fullyrða að það verður enginn fyrir vonbrigðum,“ segir Jón Gunnar Sigurjónsson, yfirverkstjóri í fiskiðjuverinu í Neskaupstað, í færslu á vef fyrirtækisins.

„Framleiðsluferillinn tekur heilan mánuð eða meira. Fyrst er síldin flökuð og skorin í bita en til framleiðslunnar er valin úrvalssíld, fersk og nýveidd hér austur af landinu. Það er vart hægt að hugsa sér ferskari og betri síld. Þegar síldin hefur verið skorin er hún sett í kör þar sem hún marínerast um tíma. Þá er síldin sett í tunnur til maríneringar og í þeim er hún í um mánaðartíma. Að því loknu er síldin tilbúin til neyslu og góðgætinu pakkað í fötur,“ útskýrir Jón Gunnar.

Hann stjórnar framleiðslunni, en uppskriftin að jólasíldinni er algjört leyndarmál.

„Hjá okkur í fiskiðjuverinu er alltaf mikil og góð stemmning þegar unnið er að framleiðslu jólasíldarinnar. Sérstaklega er skemmtilegt og mikið stuð þegar síldin er sett í föturnar,“ segir Jón Gunnar.