Morgunblaðið | 7.11.2022 | 13:28 | Uppfært 15:57

Kaupa stærsta pramma Íslandssögunnar

Pramminn sem Arnarlax mun taka í notkun verður sá stærsti sem nýttur er hér á landi. Mynd/Scale AQ

Fiskeldisfyrirtækið Arnarlax á Vestfjörðum hefur gengið frá samningi um kaup á stærsta fóðurpramma sem sést hefur hér á landi og með þeim stærri sem sést hafa í fiskeldisgeiranum á heimsvísu. Hann tekur 900 tonn af fóðri og er hannaður til að þola allt að 11 metra ölduhæð, að því er segir á vef framleiðandans Scale AQ.

Þar segir að Arnarlax búi við sérstaklega krefjandi veðurfarslegar aðstæður og því hafi verið ákveðið að festa kaup á steyptum pramma sem gengur undir nafninu Ásgarður 900 (Aasgard 900), en pramminn er sá fyrsti af þessari tegund sem tekinn verður í notkun.

Pramminn getur borið 120 tonn af meltu og verið þakinn 200 tonnum af hrími og klaka án þess að það hafi áhrif á stöðugleika hans, en burðargeta hans er alls 1.500 tonn.

Pramminn mun þjónusta fisk í kvíum félagsins á Vestfjörðum. Ljósmynd/Arnarlax

„Við erum vön að starfa á opnum og óvörðum svæðum. Til þess að fá aðgang að auknu framleiðslurými erum við að koma okkur utar í firðina. Það hefur í för með sér auknar áskoranir í tengslum við veður, vind og sjó,“ er haft eftir Birni Hembre, forstjóra Arnarlax.

„Vegna erfiðra veðurskilyrða getur verið erfitt að komast að sjókvíunum til að sinna fóðrun og er því gert ráð fyrir að hægt verði að stýra fóðruninni úr landi. Þá segir Hembre einnig mikilvægt að pramminn skapi vinnuumhverfi sem tryggir öryggi starfsmanna,“ segir hann.

Stærri en sá fyrir austan

Pramminn er alls 40,5 metrar að lengd og 13,5 metra breiður. Um borð er vinnustofa, fjórar káetur, eldhús og dvalarrými fyrir starfsmenn. Þá er hægt að tengja prammann rafmagni úr landi auk þess sem gert er ráð fyrir ljósavél og olíutanki.

Fiskeldi Austfjarða/Laxar, sem rekið er undir nafni eignarhaldsfélagsins Ice Fish Farm, fengu í vor afhentan fyrsta steypta fóðurprammann á Íslandi. Sá gat borið 600 tonn af fóðri og var af gerðinni Ásgarður 600. Sá er 33 metrar á lengd og 13,5 metrar á breidd.