Morgunblaðið | 17.11.2022 | 19:37

Fyrsti afli Bergs til Vísis í Grindavík

Bergur VE og Vestmannaey VE lönduðu fullfermi á þriðjudag. Ufsi úr BErgi verður fyrsti afli skipanna sem fer til vinnslu hjá Vísi, nýs dótturfélags Síldarvinnslunnar. mbl.is

Ufsi sem togarinn Bergur VE landaði í Vestmannaeyjum á þriðjudag var fyrsti afli sem skipið skilar til vinnslu hjá Vísi hf. í Grindavík, en Vísir er nú dótturfélag Síldarvinnslunnar eins og Bergur ehf. sem gerir togarann út.

Flest bendir til að skip sem Síldarvinnslan býr yfir, beint eða óbeint, skili afla í auknum mæli til vinnslu í Grindavík sérstaklega í ljósi þess hve takmarkað hráefni er nú í boði vegna skerðinga í úthlutuðum aflaheimildum.

Frétt af mbl.is

Bolfiskvinnsla SVN byggist upp á suðvesturhorninu

Eyjaskipin með fullfermi

Fram kemur í færslu á vef Síldarvinnslunnar að Vestmannaey VE, sem dótturfélagið Bergur-Huginn ehf. gerir út, hafi ásamt Bergi VE landað fullfermi í Vestmannaeyjum síðastliðinn þriðjudag.

„Það var sæmilegt veður mest allan túrinn en þó var bölvuð bræla í rúman sólarhring. Það var veitt í Sláturhúsinu og á Öræfagrunni og síðan endað í þorski á Víkinni. Það eru tíðindi að nú fer ufsinn til vinnslu hjá Vísi í Grindavík en það er í fyrsta sinn sem afli frá okkur fer þangað, enda er Vísir formlega orðinn dótturfélag Síldarvinnslunnar,“ segir Jón Valgeirsson, skipstjóri á Bergi, í færslunni. Aflinn var blandaður en mest var af ufsa auk skarkola, þorski og ýsu.

Frétt af mbl.is

Heimilar samruna Síldarvinnslunnar og Vísis

Þá segir Egill Guðni Guðnason, skipstjóri á Vestmannaey, aflann sem skipið hafi borið að landi hafi verið mest karfi og ýsa en einnig nokkuð af ufsa og þorsk. „Veitt var í Hornafjarðardýpinu og Breiðamerkurdýpi og síðan var dregið vestureftir í bölvaðri brælu. Um tíma var veðurhæðin um 30 metrar. Ég geri ráð fyrir að næst verði haldið austurfyrir land. Veðurspáin er einfaldlega þannig og síðan er ekki sérlega mikill fiskur við suðurströndina um þessar mundir og það kemur ekki á óvart.“

Skipin halda bæði til veiða á ný í kvöld.