Morgunblaðið | 30.11.2022 | 11:00 | Uppfært 13:26

Heimilislegar skreytingar í Hvíta húsinu

Jill Biden er búin að skreyta fyrir jólin. AFP

Skreytingarnar í Hvíta húsinu, bústað forseta Bandaríkjanna, eru persónulegri og heimilislegri í ár en oft áður. Þemað í ár er setningin „We the People“ sem er fyrsta setningin í formálanum að stjórnarskrá Bandaríkjanna.

Venju samkvæmt er það forsetafrúin sem sér um skreytingar Hvíta hússins. Jill Biden forsetafrú skreytti trén í ár með sérstökum kúlum með spegli svo fólk geti séð sjálft sig í Hvíta húsinu.

„Það er mikill ásetningur á bak við þetta, mjög meðvitað. Það er mjög mikilvægt fyrir forsetafrúna að fólk sjái sjálft sig í skreytingunum,“ sagði talsmaður skrifstofu forsetafrúarinnar.

Skreytingarnar í ár eru heimilislegri og persónulegri en oft áður. AFP

170 sjálfboðaliðar

Í aðalhlutverki í skreytingunum í ár eru líka myndir af nemendum, handskrifaðar uppskriftir og einnig gæludýr forsetahjónanna, hundurinn Commander og kötturinn Willow.

Alls eru 77 jólatré í húsinu í ár, 25 kransar og 83.615 ljósaperur. Það voru svo 170 sjálfboðaliðar hvaðanæva að úr Bandaríkjunum sem eyddu viku í að skreyta hvern krók og kima forsetabústaðarins. Þeirra á meðal voru tvær systur forsetafrúarinnar.