Morgunblaðið | 16.12.2022 | 11:20

Niðurstaðan hefur ekki áhrif áætlanir Eskju

Páll Snorrason, framkvæmdastjóri útgerðarfélagsins Eskju á Eskifirði, kveðst ekki hafa gert ráð fyrir að desemberleiðangur HAfarnnsóknastofnunar myndi skila viðbótakvóta í loðnu. Ljósmynd/Eskja

Páll Snorrason, framkvæmdastjóri Eskju, segist ekki hafa átt von á því að leiðangur Hafrannsóknastofnunar nú í desember myndi skila viðbótarkvóta í loðnu. Áætlanir Eskju vegna loðnuvertíðarinnar munu því ekki taka einum breytingum.

Guðmundur J. Óskarsson, sviðsstjóri uppsjávarsviðs Hafrannsóknastofnunar, segir í Morgunblaðinu í dag að desembermælingin gefi ekki marktæka mynd af stærð veiðistofnsins og veiðiráðgjöfin fyrir komandi vertíð yrði því ekki endurskoðuð. Endanlegar niðurstöður leiðangursins verða kynntar eftir helgi.

Frétt af mbl.is

Loðnumælingin ekki marktæk

„Við hjá Eskju erum að nýta tímann núna í viðhaldsverkefni, koma fyrir nýjum sjóðurum í mjöl og lýsisvinnsluna hjá okkur og svo er Jón Kjartansson SU 111 í Færeyjum í viðhaldi,“ segir Páll. Þá sé gert ráð fyrir að fara á kolmunna í byrjun janúar til að klára þær veiðar.

„Þessi leiðangur hefur því enginn áhrif á okkar plön en við erum með um 17 þús. tonn af heimildum sem verður unnið í manneldi hjá okkur í febrúar og mars en við vonumst nú samt til að mæling í janúar muni gefa betri niðurstöðu og staðfesta upphafskvótann og vonandi skila einhverri viðbót,“ útskýrir hann.