Morgunblaðið | 20.12.2022 | 10:10

Loðnumælingin engin vonbrigði

Gunnþór Ingvason, forstjóri Síldarvinnslunnar, segir ekki óeðlilegt að ekki náist að mæla loðnu á þessum árstíma.

„Það eru í raun engin vonbrigði, það hefur ekki oft náðst að mæla loðnu á þessum tíma, en að sama skapi er mikilvægt að vera með stöðumat á hvert gangan er komin, til að tímasetja janúarleiðangurinn,“ segir Gunnþór Ingvason, forstjóri Síldarvinnslunnar, um loðnuleiðangur Hafrannsóknastofnunar í Morgunblaðinu í dag.

Eins og fram kom í Morgunblaðinu síðastliðinn föstudag þótti mæling desemberleiðangurs Hafró ekki marktæk. Ráðgjöf um hámarksafla vegna loðnuvertíðarinnar verður því ekki endurskoðuð á grundvelli leiðangursins. Meðal þess sem aftraði yfirferð skipa í leiðangrinum var hafís úti fyrir Vestfjörðum og norðvesturmiðum.

Frétt af mbl.is

Loðnumælingin ekki marktæk

„Það liggur alveg fyrir að við munum haga veiðum og nýtingu með þeim hætti að við eigum aflaheimildir í okkar verðmætustu framleiðslu,“ segir Gunnþór.

Fjallað er um málið í Morgunblaðinu í dag.