Morgunblaðið | 27.12.2022 | 11:14 | Uppfært 11:31

Man ekki eftir viðlíka snjó síðan 2008

Björgunarsveitarbíll á ferðinni. Ljósmynd/Landsbjörg

„Ég man ekki eftir svona miklum snjó síðan 2008 þegar það snjóaði allt í kaf hjá okkur,“ segir Guðni Oddgeirsson úr björgunarsveitinni Þorbirni um snjókomuna þar í bæ í nótt og í morgun.

„Það er kannski ekki sama snjómagn og þá en þetta er helvíti mikið.“

Háum snjósköflum og gríðarmiklum snjó var lýst í Facebook-færslu Þorbjarnar í nótt.

Frétt af mbl.is

Gríðarlega mikill snjór í Grindavík

Björgunarsveitin var að til klukkan rúmlega fjögur í nótt og sinnti um 10 til 15 verkefnum í gærkvöldi og í nótt. Flest snerust þau um að losa fasta bíla frá því í gærkvöldi á Suðurstrandarvegi, Grindavíkurvegi og í Grindavíkurbæ.

Einnig fór sveitin í verkefni norðan megin á Reykjanesskaga.

Frétt af mbl.is

Skutla heilbrigðisstarfsfólki og tryggja flutninga

Núna er björgunarsveitin í nokkrum verkefnum á Nesvegi vegna fastra bíla.

Búið er að opna nánast allar götur í Grindavík, að sögn Guðna, og er unnið við að keyra snjónum í burtu. Ruðningstæki frá Grindavíkurbæ byrjuðu að ryðja götur bæjarins um hálffimmleytið í morgun og eru þær enn að störfum.