Morgunblaðið | 29.12.2022 | 12:50

Loka gluggum og taka fram kerti og spil

Snjór á Reyðarfirði. Mynd úr safni. Ljósmynd/Fjarðabyggð

„Menn finna að það er farið að kólna í húsum. Hér eru lokaðir gluggar og kertaljós.“

Þetta segir Jón Björn Hákonarson, bæjarstjóri Fjarðabyggðar, um yfirstandandi rafmagnsleysi á Reyðarfirði. Hann hvetur fólk til að hafa glugga lokaða og draga fram kerti og spil.

Eins og áður hefur verið greint frá er rafmagnslaust á Reyðarfirði, vegna bilunar í spennivirkjun á Stuðlum inni í Reyðarfirði.

RARIK óttast að rafmagnslaust verði fram á kvöld í bænum en unnið er að því að flytja varaafl og varaspenni víða af landinu.

Frétt af mbl.is

Rafmagnslaust á Reyðarfirði fram á kvöld

Jón Björn Hákonarson bæjarstjóri Fjarðabyggðar. Ljósmynd/Aðsend

Lán í óláni

Jón Björn segir stærsta vandamálið við rafmagnsleysið á svæðinu vera áhrif á húshita. Hann bendir á að öll hús í Reyðarfirði séu kynt með rafmagni eins og á flestum stöðum á Austurlandi.

„Það hefur heilmikil áhrif, allt þéttbýlið er úti. Því lengur sem rafmagnsleysið varir því minni verður hiti í húsunum.“

Hann segir það þó vera lán í óláni að veðrið á svæðinu sé ekki jafn slæmt og veðurspár gerðu ráð fyrir.

Gul veðurviðvörun er í gildi á Austfjörðum í dag og fram á morgun og er spáð fimmtán til tuttugu metrum á sekúndu með éljagangi og skafrenningi.

Ófært í bæinn

Að sögn Jóns vinnur RARIK að því núna að koma varaafli frá Seyðisfirði og varaspenni frá Akureyri í bæin. Reiknað er með að rafmagn verður aftur komið á í kvöld.

Ófært er um Fagradal eins og stendur sem gerir starfsmönnum RARIK erfitt fyrir að komast á staðinn.

Jón segir mikilvægt að vinna þetta sem hraðast og bætir við að Vegagerðin ætti að vinna bug á ófærðinni í Fagradal seinna í dag. Hann telur það ólíklegt að rafmagnsleysið vari fram á næsta dag.