Morgunblaðið | 5.1.2023 | 10:18

Sólarmetið í Reykjavík féll í fimbulkulda

Ísland í vetrarskrúða. Landið okkar er ægifagurt séð utan úr geimnum. Myndin var tekin á nýársdag úr gervitungli Copernicus-áætlunar ESB, sem Ísland er aðili að.

Nýliðinn desember var óvenju kaldur um land allt en jafnframt sérlega sólríkur í Reykjavík. Þótt sólargangurinn sé skemmstur á þessum tíma ársins mældist 51 sólarstund í höfuðborginni í desember, sem er 38,4 stundum yfir meðallagi áranna 1991 til 2020.

Þetta er sólríkasti desembermánuður frá upphafi mælinga í Reykjavík.

Veðurstofan birti í fyrrakvöld tíðarfarsyfirlit fyrir desember. Það staðfesti það sem landsmenn höfðu á tilfinningunni, að mánuðurinn hafi verið óvenju kaldur. Þetta var kaldasti desembermánuður á landinu síðan 1973, eða í nær hálfa öld.

Meðalhiti í byggðum landsins var -4,0 stig, og var mánuðurinn áttundi kaldasti desembermánuður á landsvísu frá upphafi mælinga.

Mun ýtarlegri umfjöllun má lesa í Morgunblaðinu í dag.