Morgunblaðið | 10.1.2023 | 8:44

Þurfa hita við frostmark í einhvern tíma

Þjónusta Selfossveitna hefur verið skert frá 8. desember. mbl.is/Eggert Jóhannesson

Sigurður Þór Haraldsson, veitustjóri Selfossveitna, segir að til þess að þjónusta veitnanna komist í venjulegt horf þurfi lofthiti að vera að minnsta kosti í kringum frostmark samfellt í einhvern tíma.

Útilaug Sundhallar Selfoss var opnuð í fyrradag eftir að hafa verið lokuð í rúman mánuð. Enn eru heitir pottar og vaðlaugar lokaðar á útisvæði.

Frétt af mbl.is

Útilaugin opnuð eftir mánaðarlokun

„Við vildum reyna að tryggja skólasundið og við sáum fram á að við gætum opnað útilaugina þar sem það hlánaði svolítið um helgina. Það safnaðist aðeins í hitaveitusvæðunum okkar,“ segir Sigurður Þór í samtali við mbl.is.

„Við metum stöðuna dag frá degi og erum að reyna að halda uppi sem mestri þjónustu við íbúana og pössum okkur á að halda okkur öruggum megin til þess að það sé alltaf nóg til húshitunar.“

Frétt af mbl.is

Gætu þurft að loka íþróttahúsum

Geta alltaf gripið til lokana ef þarf

Sigurður segir að jólafrí í skólum á Selfossi hafi haft mikið að segja til þess að spara heitt vatn með minni kyndingu í skólunum en 20 stiga frost mældist á milli jóla og nýárs.

„Desembermánuður var fordæmalaus í kulda liggur við. Plús þessi bilun sem við lentum í í byrjun mánaðarins.“

Frétt af mbl.is

Íbúar beðnir um að spara vatn vegna eldsvoða

„Nú er búið að opna alla skóla og þetta virðist nú vera alveg í góðu lagi núna. Við getum alltaf gripið aftur til þessara aðgerða að loka lauginni ef við þurfum á því að halda.“