Morgunblaðið | 12.1.2023 | 10:05

Leggur til kvótasetningu grásleppu

Svandís Svavarsdóttir, matvælaráðherra, hefur hafið samráð um kvótasetningu grásleppuveiða. Ljósmynd/Stjórnarráðið

Svandís Svavarsdóttir matvælaráðherra hefur hafið samráðsferli vegna áforma um að kvótasetja grásleppuveiðar með lagafrumvarpi.

Fram kemur í umfjöllun Morgunblaðsins að lagt sé til að við kvótasetningu verði lögbundin 2% hámarkshlutdeild og að kvótinn, þrátt fyrir að vera framseljanlegur, verði bundinn við landshluta. Auk þess er lagt til að komið verði á sérstökum nýliðunarkvóta í grásleppu sem úthlutað er gjaldfrjálst að undanskilinni greiðslu veiðigjalda og þjónustugjalda.

Kvótasetningu grásleppuveiða fylgir einnig innheimta veiðigjalda sem áætlað er að skili ríkissjóði um 35 milljónum króna.

Verði af áformunum verða grásleppuveiðarnar bundnar kvótaeign. mbl.is/Hafþór Hreiðarsson

Í lýsingu á áformunum sem birt hefur verið í samráðsgátt stjórnvalda er vakin athygli á að núverandi fyrirkomulag hafi „sætt gagnrýni fyrir að vera ómarkviss og ófyrirsjáanleg fyrir þá sem stunda veiðarnar“. Auk þess sem talning veiðidaga hefjist um leið og veiðileyfi er virkjað sem tekur ekki tilli til veðurs, bilana eða veikinda.

Jafnframt er bent á að aldur grásleppuveiðimanna hafi hækkað og lítil nýliðun verið undanfarin ár.