Morgunblaðið | 18.1.2023 | 10:41

Ásta Dís í stjórn Samherja

Ásta Dís Óladóttir tekur sæti í stjórn Smaherja. Ljósmynd/Samherji

Ásta Dís Óladóttir hefur tekið sæti í stjórn Samherja hf. í stað Helgu Steinunnar Guðmundsdóttur, sem setið hefur í stjórn félagsins um árabil og gegnt trúnaðarstörfum fyrir félagið. Ásta Dís hefur ekki áður setið í stjórn Samherja hf.

Þetta kemur fram í tilkynningu á vef Samherja.

Ásta Dís er dósent við Viðskiptafræðideild Háskóla Íslands, með BA gráðu í félags- og atvinnulífsfræði, meistaragráðu í stjórnun og stefnumótun frá Háskóla Íslands og doktorsgráðu í alþjóðaviðskiptum frá Copenhagen Business School. Ásta Dís hefur á undanförnum árum komið að uppbyggingu náms í sjávarútvegi í Háskóla Íslands og kennt meðal annars námskeiðið Rekstur í sjávarútvegi. Þá er hún annar höfundur bókarinnar Fisheries and aquaculture, the food security of the future sem Elsevier gaf út 2021.

Þá segir að Ásta Dís hafi umfangsmikla stjórnunarreynslu og hefur setið í fjölmörgum stjórnum, nefndum og ráðum. Í dag er hún stjórnarformaður Viðskiptafræðistofnunar Háskóla Íslands og MBA náms, Rannsóknarmiðstöðvar Ferðamála og Félags háskólakvenna. Þá er hún formaður Jafnvægisvogarráðs og Vísindasjóðs Háskólans á Akureyri.“

Frétt af mbl.is

Veiðar munu ekki standa undir stöðugri fólksfjölgun

Fjögurra áratuga samstarf

Í tilkynningunni þakkar stjórn og starfsfólk Samherja Helgu Steinunni fyrir ánægjulega samfylgd og farsælt samstarf, en hún hefur tekið þátt í uppbyggingu félagsins frá því að höfuðstöðvarnar voru fluttar til Akureyrar fyrir fjórum áratugum síðan.

Hún sat í stjórn Samherja frá árinu 2013 og var stjórnarformaður Samherjasjóðsins frá stofnun, Sjóðurinn hefur meðal annars stutt dyggilega við íþróttahreyfinguna á Íslandi.