Morgunblaðið | 8.2.2023 | 11:28 | Uppfært 12:18

Lítið að frétta af miðunum

Mörg skip voru við bryggju í Norðfjarðarhöfn á meðan vonskuveður gekk yfir. Ljósmynd/Síldarvinnslan: Smári Geirsson

Vonskuveður undanfarna daga hefur gengið niður og eru fiskiskipin byrjuð að halda á miðin á ný eftir að hafa beðið af sér versta kaflann.

„Í morgun voru loðnuskipin Börkur NK, Beitir NK og Vilhelm Þorsteinsson EA að skima eftir loðnu út af Borgarfirði [Eystri],“ að því er fram kemur í færslu á vef Síldarvinnslunnar. Þar segir jafnframt að togararnir Vestmannaey VE og Bergur VE, sem legið hafa í Norðfjarðarhöfn, hafi einnig haldið til veiða og lét Gullver NS úr höfn á Seyðisfirði í gærkvöldi.

„Héðan er heldur lítið að frétta. Þetta leit vel út í myrkrinu en skipin hérna eru þó ekkert farin að gera enn. Við höfum semsagt eitthvað séð en ekkert aðhafst. Veðrið er gott og ölduhæðin lítil. Það er hins vegar mun verra veður sunnar,“ segir Tómas Kárason, skipstjóri á Beiti NK, í færslunni.

Mikill fjöldi skipa var í höfnum Austurlands um helgina á meðan beðið var eftir því að veður gengi niður. Fjöldinn er óvenju mikill vegna loðnuvertíðar og er fjöldi norskra skipa mætt til veiða í íslenskri lögsögu.