Morgunblaðið | 13.2.2023 | 13:55

Loðnuvertíðin aðeins nokkurra vikna gluggi

Páll snorrason, framkvæmdastjóri Eskju á Eskifirði, segir fjórar til sex vikur eftir af loðnuvertíðinni sem er ný hafin. Ljósmynd/Eskja

Loðnuvertíðin er í startholunum en þó er stutt eftir af vertíðinni og megnið af 180 þúsund tonna loðnukvóta enn ónýttur. Margar afurðastöðvar sem taka við aflanum eru nú háðar olíu þar sem ekki fæst afhent nægt rafmagn.

„Við erum búin að aðlaga verksmiðjurnar að rafmagni og með sjálfbærni að leiðarljósi. Þetta er bara nýtt ástand sem þarf að bregðast við og við erum einmitt að fjárfesta mikið í nýjum búnaði fyrir varaflið um þessar mundir,“ segir Páll Snorrason, framkvæmdastjóri hjá Eskju, í 200 mílum sem fylgdi Morgunblaðinu á laugardag.

Páll segir loðnuvertíðina verða stutta. „Héðan í frá er um að ræða um það bil einn mánuð, kannski fimm vikur og vonandi sex. Ég á von á því að þessari loðnuvertíð ljúki á bilinu 15. til 20. mars. Við eigum töluvert eftir að veiða á þessum tímapunkti og veður mun skipta sköpum.“