Morgunblaðið | 18.2.2023 | 14:23

Hrifin af „hávöxnum og flúruðum“ íslenskum karlmönnum

Love is Blind-stjarnan Raven Ross. Skjáskot/Instagram

Love is Blind-stjarnan og pílatesþjálfarinn, Raven Ross, virðist hafa orðið fyrir mikilli hugljómun þegar hún fór í ævintýraferð til Íslands í ársbyrjun á vegum skyrgerðarinnar Siggi's.

Ross tók þátt í þriðju þáttaröð raunveruleikaþáttanna Love is Blind á streymisveitunni Netflix. Þar kynntist hún fyrrverandi kærasta sínum, SK Algbada. Þegar Ross kom á klakann hafði fyrrverandi parið nýverið hætt saman eftir rúmlega árslangt samband í kjölfar orðróms sem fór á kreik um meint framhjáhald Algbada.

Ross birti myndir frá Íslandsferð sinni á Instagram þar sem hún sagðist vera algjörlega heilluð af landinu, en nú hefur komið í ljós að það hafi ekki einungis verið landslagið sem heillaði þjálfarann.

Frétt af mbl.is

Love is Blind-stjarna heilluð af Íslandi

Tilbúin að láta reyna á ástina

Eftir dramatísk sambandsslit virðist Ross vera tilbúin að láta reyna á ástina aftur en hún virðist þó ætla að kanna nýjar lendur. Í nýlegu TikTok-myndskeiði játaði Ross ást sína á íslenskum karlmönnum og sagði að þeir væru bæði „hávaxnir og flúraðir.“

„Ég að kveðja týpuna mína eftir að hafa séð hversu fallegir karlmenn á Íslandi eru,“ skrifaði þjálfarinn við myndskeiðið sem hefur þegar fengið 1,4 milljónir áhorfa.

@pilatesbodyraven
they’re tall AND tatted 🤤
♬ original sound - Burna Boy

Æstir notendur lofsama íslenska karlmenn

Fylgjendur Ross á miðlinum voru sannarlega spenntir yfir játningu hennar, en raunveruleikastjarnan virtist ansi sannfærandi þar sem margir sögðust ætla að bóka sér beint flug til Íslands.

„Hún ætlar að búa til þátt sem heitir „Love is in Iceland“,“ skrifaði einn fylgjandi hennar á meðan annar steig fram með svipaða játningu: „Fallegasti maður sem ég hef séð var starfsmaður á bensínstöð á Íslandi.“

Einn notandi líkti íslenskum karlmönnum við Ken-dúkkuna á meðan aðrir sögðu íslenska karlmenn vera „sanna víkinga.“