Morgunblaðið | 22.2.2023 | 8:00

Í Mexíkó með hárgreiðslumeistara stjarnanna

Chris Appleton, hárgreiðslumeistari stjarnanna, og Lukas Gage, leikari, eru nýjasta par Hollywood. Samsett mynd

Það væsir ekki um leikarann Lukas Gage sem er um þessar mundir staddur í sólinni í Mexíkó ásamt hárgreiðslumeistaranum Chris Appleton. Gage og Appleton eru sagðir vera nýjasta parið í Hollywood.

Parið ákvað að nýta tækifærið og opinbera sambandið á Instagram, en þar birtu þeir skemmtilega myndasyrpu frá fríinu. Af myndum að dæma voru þeir í sannkölluðu lúxusfríi og nutu þess að sóla sig í Kyrrahafinu áður en þeir fóru í fjórhjólaferð.

View this post on Instagram

A post shared by Chris Appleton (@chrisappleton1)

Gage og Appleton völdu að sjálfsögðu lúxusgistingu, en þeir dvelja á hinni glæsilegu St. Regis Punta Mita Resort sem er staðsett á besta stað við ströndina. Það er sannarlega ekki ókeypis að gista á hótelinu, en ein nótt fyrir tvo kostar á bilinu 189 til 861 þúsund krónur.

Glæsileg aðstaða á lúxushótelinu. Ljósmynd/Booking.com

Báðir stór nöfn í Hollywood

Appleton á glæstan feril að baki sem hárgreiðslumeistari og hefur unnið með stórstjörnum á borð við Kim Kardashian, Jennifer Lopez og Ariana Grande. Þá hafa verkefni hans birst í tískutímaritum eins og Vogue, Harper's Bazaar og Vanity Fair.

Gage skaust á stjörnuhimininn þegar hann fór með hlutverk Tyler Clarkson í vinsælu þáttaröðum Euphoria. Síðan þá hefur hann farið með ýmis hlutverk, en hann er líklega þekktastur fyrir hlutverk sín í þáttum The White Lotus og í nýjustu þáttaröð You á streymisveitunni Netflix.