Morgunblaðið | 24.2.2023 | 9:15 | Uppfært 10:15

„Menn misskilja algjörlega þessa grein“

Valmundur Valmundsson, formaður Sjómannasambands Íslands, segir marga misskilja ákvæði í nýjum kjarasamningi sjómanna. mbl.is/Eggert Jóhannesson

„Menn misskilja algjörlega þessa grein 1.39.1 um ný skip og nýjar veiðigreinar,“ segir Valmundur Valmundsson, formaður Sjómannasambands Íslands (SSÍ), í Morgunblaðinu í dag um þá gagnrýni sem nýr kjarasamningur sjómanna hefur hlotið.

Samningurinn var undirritaður 9. febrúar síðastliðinn og hófst atkvæðagreiðsla meðal sjómanna 17. febrúar og lýkur 10. mars. Í vikunni ritaði Ægir Ólafsson varaformaður SSÍ pistil sem birtur var á vef sambandsins þar sem hann biðlaði til sjómanna að samþykkja samninginn og hafna honum ekki á grundvelli villandi upplýsinga á samfélagsmiðlum.

Frétt af mbl.is

Biðlar til sjómanna að fella ekki samninginn

Snýr málið að ákvæði um breytingar á skiptaprósentu – sem er til grundvallar launum sjómanna – við fjölgun eða fækkun í áhöfn vegna fjárfestinga í nýju skipi eða búnaði. Markmiðið er sagt vera að tryggja hlut sjómanna í ágóðanum sem verður til við fjárfestinguna.

„Það vorum við sem fórum fram á að þessari grein yrði breytt, þannig að við höfum eitthvað í höndum til að veita viðspyrnu. Það er ekki nóg að útgerðin komi og segist hafa sett upp nýjan flokkara á millidekkið og krefjist lægri skiptaprósentu, það verður að sýna fram á verðmætisaukningu. Að halda því fram að eðlilegt viðhald á skipi gæti lækkað skiptaprósentuna er bara bull. Það er bara útgerðarmanna að halda sínum tækjum og tólum við án þess að við komum nálægt því. Menn eru algjörlega að misskilja þess grein,“ segir Valmundur.