Morgunblaðið | 26.2.2023 | 8:00

Bestu fjölskylduvænu hótelin á Mallorca

Ferðavefurinn tók saman fjölskylduvæn hótel á Mallorca. Samsett mynd

Sólarfrí með fjölskyldunni er alltaf góð hugmynd. Fjölskyldufrí geta þó verið áskorun fyrir marga foreldra og þá er eins gott að bóka á fjölskylduvænu hóteli þar sem nóg er um að vera fyrir krakkana.

Mallorca er frábær staður fyrir fjölskyldur og þar er að finna mjög góð hótel fyrir allar fjölskyldugerðir. Í raun eru mörg af bestu hótelum eyjunnar einmitt mjög fjölskylduvæn svo foreldrar þurfa ekki að gefa neinn afslátt af öðrum þægindum.

Zafiro Palace Alcúdia

Þetta hótel er í Poerto de Alcúdia hverfinu á Mallorca og með alls konar dagskrá sem er sér hönnuð fyrir börn. Hótelið er með fimm stjörnur svo foreldrarnir geta notið alls þess besta sem lífið hefur upp á að bjóða og haft gaman með börnunum sínum. Þar eru fjölskyldusvítur fyrir allt að sex manna fjölskyldur með beinan aðgang að sundlaug. Á hótelinu er krakkaklúbbur fyrir börn á aldrinum 4 til 16 ára.

Zafiro Palace Alcúdia. Ljósmynd/Zafiro Palace Alcúdia

Belmond La Redidencia

Á Belmond hótelinu Deia-hverfinu er nóg að gera fyrir krakkana. Þar geta krakkarnir farið á matreiðslunámskeið, farið í lautarferðir, heimsótt asna og fengið leiðsögn í tennis. Krakkaklúbburinn er fyrir fjögurra ára og eldri og hægt er að ráða barnfóstru á hótelinu.

Stór herbergi eru í boði og frábærar svítur fyrir alla fjölskylduna.

Belmond La Redidencia. Ljósmynd/Belmond La Redidencia

Hotel Portixol

Portixol er í samnefndu hverfi í borginni Palma. Í grennd við hótelið er Palma-ströndina. Miðbærinn er í stuttri göngufjarlægð frá hótelinu og hægt að leigja hjól á hótelinu. Þá er frábær sundlaug á hótelinu þrátt fyrir að vera í borginni.

Hotel Portixol. Ljósmynd/Hotel Portixol

Jumeirah Port Sóller Hotel & Spa

Þetta hótel er staðsett ofan á kletti með glæsilegt útsýni yfir Port de Sóller. Þetta er glæsilegt lúxushótel með krakkaklúbb fyrir börn á aldrinum 3 til 12 ára. Gestir fá tvær klukkustundir fríar á dag fyrir börnin sín.

Jumeirah Port Sóller Hotel & Spa. Ljósmynd/Jumeirah Port Sóller Hotel & Spa

Robinson Club Cala Serena

Þetta hótel er fyrir fjölskyldur sem elska að hreyfa sig. Hægt er að sopila tennis og fótbolta við hótelið og einnig er hægt að fara í fjallahjólaferðir frá því. Þá er krakkaklúbbur fyrir þriggja ára og eldri og hægt er að bóka barnapössun.