Morgunblaðið | 2.3.2023 | 18:38

Endurskoða loðnuveiðiráðgjöf

Loðnuveiðar úti fyrir Þorlákshöfn fyrir nokkrum árum. mbl.is/Golli

Hafrannsóknastofnun hefur ákveðið að endurskoða loðnuveiðiráðgjöf sem gefin var út 24. febrúar fyrir núverandi fiskveiðiár.

Þetta kemur fram í tilkynningu Hafrannsóknarstofnunar en þar segir jafnframt að endurskoðunin felist í því að stofnunin telji óhætt að hverfa frá ráðgjöf um svæðaskipt aflamark.

„Endurskoðunin byggir á ítarlegri yfirferð veiðiskipa fyrir Norðurlandi, með sérstaka áherslu á Húnaflóasvæðið, ásamt könnun rannsóknaskipsins Bjarna Sæmundssonar og veiðiskipsins Venusar NS út af norðanverðum Vestfjörðum dagana 27. febrúar til 2. mars. Þessar athuganir gefa til kynna að loðnan sem mældist út af Húnaflóa 12.-21. febrúar sé nú á göngu vestur fyrir land.“

Gert er ráð fyrir því að loðnan muni hrygna þar en ekki fyrir norðan land líkt og var forsenda fyrri ráðgjafar um að veiðar fari fram fyrir norðan land. Heildaraflamarkið er hinsvegar óbreytt frá fyrri ráðgjöf, eða 459 800 tonn, að því er fram kemur í tilkynningunni.