Morgunblaðið | 10.3.2023 | 18:25 | Uppfært 19:57

Telur ekki þörf á stórvægilegum breytingum

Heiðrún Lind Marteinsdóttir framkvæmdastjóri SFS. Árni Sæberg

„Þetta kemur að sjálfsögðu á óvart. Maður hafði þó heyrt af því að töluverður hópur væri jákvæður gagnvart samningnum en einnig hópur sem var neikvæður. Því var alveg hægt að gera sér það í hugarlund að þetta yrði niðurstaðan,“ segir Heiðrún Lind Marteinsdóttir, framkvæmdastjóri Samtaka fyrirtækja í Sjávarútvegi (SFS).

Sjómenn höfnuðu í dag kjarasamningi sem gerður var 9. febrúar á milli Sjómannasambands Íslands og SFS.

Hún segir ekki gott að segja til um það hvar ásteytingarsteinninn er. „Mér heyrist sama vera uppi á teningnum hjá forsvarsmönnum stéttarfélaganna,“ segir Heiðrún Lind.

Hún segir þegar hafa verið komið að verulegu leyti til móts við kröfur stéttarfélaganna.

„Ég get ekki ímyndað mér að það þurfi stórvægilegar breytingar frá þeim samningi sem gerður var,“ segir Heiðrún Lind.