Majorka á Spáni er töfrandi áfangastaður sem býður ferðalöngum upp á stórkostlegt fjallalandslag, tæran sjó og rómantískt andrúmsloft.
Listamenn, rithöfundar, skáld og tónlistarmenn hafa í áratugi sótt innblástur í eyjuna, enda leynist þar mikil fegurð. Það er óhætt að segja að hótelin séu þar ekki undanskilin þar sem fagurfræðin er í forgangi.
Can Ferrereta
Þetta hótel er staðsett í Santanyí á suðausturhluta Majorka. Minimalísk hönnun einkennir hótelið þar sem mildir jarðtónar eru áberandi í bland við náttúrulegan efnivið sem stenst tímans tönn.
Finca Serena Mallorca
Hótelið stendur á 12 hektara landi og er umvafið ótrúlegri náttúrufegurð. Þar er boðið upp á skemmtilega matarsenu og fallega hönnun.
Es Racó d´Artà
Hótelið er staðsett í Artá og er sannkallað augnakonfekt. Arkitektinn og hönnuðurinn Antoni Esteva og byggingameistarinn Jaume Danús eru á bak við mörg flottustu hótel Majorka, en þetta hótel er talið vera eitt af þeirra bestu verkum hingað til.
Cal Reiet Holistic Retreat
Hótelið er hinn fullkomni staður fyrir þá sem setja heilsu og vellíðan í fyrsta sæti. Þar er boðið upp á skemmtilega líkamsræktartíma, hollan mat og nudd.
Brondo Architect
Þetta hótel hefur fengið umfjöllun víðsvegar, þar á meðal í hönnunartímaritinu Architectural Digest, og ekki að ástæðulausu. Á hótelinu eru upprunaleg gólfefni, retró-húsgögn og nútímaleg lýsing sem búa til einstaka stemningu sem hönnunarunnendur kunna að meta.