Morgunblaðið | 25.3.2023 | 12:55

Vill hrekja gróusögur um eltihrelli

Þorsteinn V. Einarsson er umsjónarmaður Karlmennskunnar.

Þorsteinn V. Einarsson, kynjafræðingur og umsjónarmaður Karlmennskunnar, greinir frá því að frásögn sé komin í dreifingu um að hann hafi eltihrellt lettneska stúlku árið 2006 eða 2007. Stúlkan á þá að hafa unnið á skemmtistaðnum Sólón.

Frétt af mbl.is

Þorsteinn segir tekjur sínar ofáætlaðar

Frá þessu greinir Þorsteinn á Facebook-síðu Karlmennskunnar. Viku eftir að frásögnin hafi farið í dreifingu hafi skjáskot farið af stað sem á að sýna skilaboð frá honum til stúlkunnar þar sem hann á að hafa hótað henni fyrir að segja frá meintu atviki. Segir hann skilaboðin vera fölsuð.

„Fortíðin mín er enginn feluleikur heldur akkúrat ástæða þess að ég hef ansi raunsanna innsýn og skilning á karlmennsku, áhrifum, afleiðingum og birtingarmyndum hennar. Margt sem ég er ekki stoltur af, vildi óska að ég hefði haft vit á að sleppa. En að eltihrella er ekki eitt af því sem ég á sögu um og enn síður að hóta þolendum,“ skrifar Þorsteinn.

Umrædd skilaboð sem eiga að hafa verið frá Þorsteini. Skjáskot/Facebook

„Ólýsanlega sárt“

Hann segir að um sé að ræða nafnlaust skjáskot dreift af nafnlausum aðgangi sem áður hafi drullað yfir þekktar íslenskar baráttukonur. Nú sé hins vegar búið að loka aðganginum.

„Mér finnst ólýsanlega sárt að til sé fólk sem er svo illa við mig að það falsar skilaboð í mínu nafni og skáldar frásögn um mig og misnota þar með frásagnarvaldið sem þolendur hafa tekið sér.“