Morgunblaðið | 18.4.2023 | 8:21 | Uppfært 19.4.2023 13:57

Breytt fyrirkomulag vegna strandveiðileyfa

Fiskistofa mun taka við umsóknum um strandveiðileyfi í gegnum stafræna gátt. Líney Sigurðardóttir

Fiskistofa hefur tekið upp breytt fyrirkomulag vegna umsókna um strandveiðileyfi og munu umsóknir um strandveiðileyfi vegna vertíð sumarsins fara í gegnum stafræna umsóknargátt á island.is, að því er fram kemur í tilkynningu á vef stofnunarinnar.

„Sótt er um með rafrænum skilríkum og strandveiðileyfið er gert aðgengilegt í stafrænu pósthólfi umsækjanda á island.is að umsókn lokinni. Í tilviki lögaðila eru það prókúruhafar sem geta sótt um strandveiðileyfi með rafrænum skilríkjum,“ segir í tilkynningunni.

Enn er þó beðið eftir að reglugerð um strandveiðar ársins verði gefin út og því hefur Fiskistofa ekki opnað fyrir umsóknir.

Eignarhald þarf að vera skýrt

Þá er vakin athygli á að Fiskistofu sé einungis heimilt að veita útgerð eða eiganda fiskiskips leyfi til strandveiða fyrir eitt skip. Þarf því stofnunin að ganga úr skugga um að enginn eigandi eða útgerðaraðili lögaðilans eigi aðild að nema einu strandveiðileyfi áður en leyfi er veitt. Vegna þessa hvetur Fiskistofa þá sem hyggjast sækja um strandveiðileyfi til að huga að því að opinberar skráningar á eignarhaldi og útgerðaraðild skips séu réttar.

„Afgreiðsla strandveiðileyfis getur tafist ef opinberar upplýsingar sýna ekki fram á eignarhald þeirra aðila sem eiga eða gera út skip þar sem Fiskstofa mun þurfa að taka þau tilvik til sérstakrar skoðunar með tilheyrandi gagnaöflun.“

Uppfært kl:13:55 19. apríl: Fiskistofa hefur vakið athygli 200 mílna á því að í tilkynningu stofnunarinnar hafi ekki verið tekið fram að ekki hafi verið opnað fyrir umsóknir. Fréttin hefur verið uppfærð með tilliti til þess.