Morgunblaðið | 30.5.2023 | 13:29

Trúlofaðir í annað sinn

Leikaraparið Ben Platt og Noah Egidi Galvin trúlofuðu sig í annað sinn um helgina. Samsett mynd

Broadway-leikarinn Ben Platt er trúlofaður Noah Egidi Galvin sem er hvað þekktastur fyrir leik sinn í þáttunum The Good Doctor.

Platt skaust upp á stjörnuhimininn eftir að hann lék titilhlutverkið í söngleiknum Dear Evan Hansen og kynntist parið þegar Galvin var fenginn til þess að taka við hlutverkinu af Platt.

Þetta er önnur trúlofun parsins en Platt bað Galvin í nóvember á síðasta ári og birti í kjölfarið fallega færslu á Instagram og skrifaði: „Hann hefur samþykkt að hanga saman að eilífu.“

Í þetta sinn var komið að Galvin að biðja Platt og hafa þeir nú báðir sett upp hringa og deildi Platt gleðifréttunum enn á ný á Instagram og sagði "Hann bað mín til baka, ég sagði, já.“