Morgunblaðið | 20.6.2023 | 13:38 | Uppfært 21.6.2023 6:36

Vonar að stjórnarsamstarfinu sé nú lokið

Vilhjálmur Birgisson, formaður Verkalýðsfélags Akraness. mbl.is/Kristinn Magnússon

„Ég vona að þessu stjórnarsamstarfi sé hér með lokið, þessi ákvörðun er ófyrirgefanleg í mínum huga,“ sagði Vilhjálmur Birgisson, formaður Verkalýðsfélags Akraness í samtali við mbl.is, spurður um hvernig hann brygðist við ákvörðun matvælaráðherra um að stöðva veiðar á langreyðum.

Frétt af mbl.is

Veiðar á langreyðum stöðvaðar

„Með þessari ákvörðun er verið að svipta 120 félagsmenn í Verkalýðsfélagi Akraness sem störfuðu á síðustu hvalveiðivertíð miklum tekjum, en meðallaun þeirra sem unnu þar fulla vinnu voru tæpar tvær milljónir króna á mánuði í fyrra sem gerir sex milljónir á vertíðinni,“ sagði Vilhjálmur.

Vilhjálmur segir að fólk hefði gjarnan tekið sér frí frá sinni vinnu til að starfa á vertíðinni og einnig hefðu fjölmargir háskólanemar unnið í hvalnum alla vertíðina og þannig komist hjá því að taka námslán.

Frétt af mbl.is

Nauðsynlegt vegna afgerandi niðurstöðu

„Nú er verið að svipta þetta fólk mjög góðum tekjum fimm mínútum fyrir vertíð,“ sagði Vilhjálmur. Hann nefndi einnig að verkslýðsfélagið hefði leitað til lögfræðings til að láta kanna réttarstöðu sinna félagsmanna sem unnið hefðu í hvalnum og hvort ríkið gæti verið bótaskylt gagnvart þeim með þessari ákvörðun Svandísar Svavarsdóttur matvælaráðherra. Hann benti einnig á að bæði Akraneskaupstaður og Hvalfjarðarsveit yrðu af miklum útsvarstekjum vegna þessa og tæpast væri mikil ánægja með þetta mál hjá forsvarsmönnum sveitarfélaganna.

„Ég trúi því ekki að það sé hægt að haga sér með þessum hætti. Í mínum huga þetta er lýðskrum og popúlismi af verstu sort sem þarna er verið að ástunda og er algerlega óboðlegt. Ég trúi því ekki að þessi ákvörðun sé tekin í samráði við hina ríkisstjórnarflokkana. Hvar endar þessi vitleysa?,“ sagði Vilhjálmur Birgisson sem ítrekaði að hann væri mjög ósáttur við þessa ákvörðun ráðherrans.